O’r tu allan mae hwn yn edrych fel ty teras arferol o oes Victoria, ond ar y tu-fewn fe welwch gynllun sy’n ‘kitsch’ ac yn hwyl. Ni fyddwn yn synnu i weld Doris Day yn cerdded o gwmpas fan hyn yn gwisgo ‘pinny’! Mae un yn cael y teimlad yn syth bod Cludfan yn perthyn i bobl greadigol, ac mae gan y cwpl sy’n byw yma, Wyn a Linda, ddiddordeb mewn cynllunio mewnol a chefndir mewn Celf a Ffotograffiaeth.
perchenogion: Wyn & Linda Davies Williams
lleoliad: Gorslas
steil: Cartref lliwgar a llawn dychymyg
nodwedd gorau: Y silffoedd yn y stafell eistedd
Fe ddyfeisiodd y cwpl yr olwg arbennig gyda chymorth Cath Kidston – arbenigwraig ar y 50au sydd bellach yn dosbarthu’i chynlluniau, o ddefnydd ac o dlysau, ar draws y byd. Mae Wyn a Linda yn bâr talentog ac maent wedi llwyddo i gael y ty i edrych yn union sut roedden nhw eisiau – camp sy’n anoddach nag y byddwch yn meddwl. Mae’n rhaid i’r cynllunwyr fod yn bwyllog a dal nôl ychydig i osgoi creu cybolfa sydd dros ben llestri.
Gan ddefnyddio lliwiau niwtral ar y waliau a dewis y celfi yn ofalus (er enghraifft y gadair dryloyw) mae golwg y ty yn un ysgafn, olau. Tynnir sylw at y lliwiau llachar trwy eu defnyddio yn yr eitemau sy’n addurno’r ystafelloedd, sy’n creu golwg nodweddiadol o’r 50au.
Byddai rhai elfennau yn edrych yn dda mewn unrhyw fath o ystafell, er enghraifft y silffoedd sy’n edrych fel tyllau colomennod (ceir rhywbeth tebyg yn Ikea). Dewiswyd y darnau mawr traddodiadol, er enghraifft y candelabra mawreddog, fel eu bod yn wrthgyferbyniad â llinellau plaen celfi’r 50au.
Mae’r gegin/ystafell fwyta fawr yn feithrinfa arbennig ar gyfer partïon, sy’n dueddol i ledaenu allan i’r decking tu-fâs. Yna mae hyd yn oed y sied ddiymhongar wedi’i throi’n nodwedd ddiddorol gan got o baent bastel.
