Wedi dianc o ffrwst a ffwdan bywyd dinesig Caerdydd, darganfu’r teulu'r cartref o feini cadarn, gyda llefydd tân mawr, agored, trawstiau pren trwchus a’r lloriau pren gwreiddiol. Fel gyda’r cynlluniau gorau, y gegin - gyda’i gypyrddau gwyrddlwyd, llenni blodeuog, llorlechi a bwrdd mawr hir ar gyfer dathliadau teuluol - yw calon y cartref.

Y mae’r lle byw yn glud ac yn fan i ymlacio ynddo, gyda’i soffas mawr, meddal, ei loriau pren brown golau a fflamiau tân go iawn yn taflu’u cochni yn y cefndir. Y mae naws hamddenol hyfryd yn perthyn i’r tŷ sy’n cyfuno defnyddiau naturiol, dodrefn cadarn, lliwiau golau esmwyth, ac, wrth gwrs, golygfeydd bendigedig o bob ffenestr.

Mae’r llofft yn debyg, gyda dodrefn syml yn yr ystafelloedd gwely, ac ystafell Llywelyn yn llond teganau, llyfrau a’r math o bethau a welir yng nghuddfan crwt bach.