Wedi eu cynllunio’n arbennig i’r gwesty gan Christophe Pillet, fy hoff bethau yw’r seddi ‘pod’, sydd yn dominyddu’r gwagle gyda’u ffurfiau cryf, ac yn ymestyn yr holl ffordd at y nenfwd. Mae’r stribedi bedw sglein wedi eu ffurfio’n siâp cloch ben i lawr, ac maen nhw’n cynnal y sedd a’r cefn lledr-smâl lliw mafon yn effeithiol iawn. Mae ffurfiau benywaidd y sedd a’r lliwiau gwrthgyferbyniol yn cynnig ymdeimlad rhywiol a chwaraeus, a’r gwagleoedd rhwng y stribedi fel gêm guddio, yn cynnig agosatrwydd ac amddiffynfa ar yr un pryd. Maer rhain yn seddi hardd iawn, ond mae'n nhw hefyd yn ymarferol a hawdd eu defnyddio.

Symlrwydd siâp yr hemisffer yw’r ysbrydiolaeth ar gyfer y greadigaeth hyfryd yma. Plastig ‘methacrylate’ tryloyw yw’r defnydd,  ac mae’r lamp yn disgyn o’r nen fel swigod sebon. Cynlluniwyd y lamp gan Ferruccio Laviani. Mae'n  cael ei  ddosbarthu gan Kartell, cwmni a ddaeth i fodolaeth yn Milan yn 1949 dan lygad craff Giulio Castelli. Y brif amcan oedd dod â phlastig i’r cartref, ac fe wireddwyd y freuddwyd – a hynny mewn steil.

Fy hoff beth...? Wel, nid Aled yn gorweddian yn y bath mae hynny’n saff! Y bath siap ?y a wnaethpwyd o goncrit llyfn ddaliodd fy sylw yma, ac mae’r deunyddiau i gyd yn gydnaws â’r amgylchedd, gan roi teimlad unigryw i’r baddon yma gan ei fod wedi ei wneud â llaw, gan gadw’r elfennau amherffaith sydd mor bwysig wrth roi bywyd a chymeriad i gelfigyn mor arbennig.  Codwyd y baddon yn y fan a’r lle, ac mae symlrwydd y cynllun yn annog y cwsmer i werthfawrogi’r wlad o gwmpas y gwesty, gan nad yw’r cynllun yn or-gymhleth nac yn tynnu’r sylw yn ormodol. Cysyniad pwysicaf y gwesty yw dod â’r cwsmer a natur ynghyd, ac fe wneir hyn yn llwyddiannus iawn wrth osod y baddon ar ymyl yr ystafell, fel bod modd ymolchi mewn awyrgylch moethus a naturiol, a bod yn noeth ir elfennau ar yr un pryd.