Boed yn gerddoriaeth, ffilm, ffasiwn, chwaraeon, celf neu deledu, bydd rhywbeth at ddant pawb yn y gyfres gylchgrawn newydd, Gofod.
Bydd wynebau newydd yn cymryd yr awenau, Elen Gwynne a Gethin Evans, ac mae'r ddau ar bigau'r drain i gychwyn ar y gwaith.
"Mae'n brofiad hollol newydd i fi. Dwi 'di arfer actio ar deledu ond mae cyflwyno'n wahanol iawn," meddai Elen, sydd fwyaf adnabyddus am ei rôl fel Susan yn y gyfres ddrama, Tipyn o Stad.
Ei chyd-gyflwynydd yw Gethin, sydd gynt o'r bandiau Genod Droog a Yutacan lle fu'n chwarae'r drymiau. Mae'r ddau wedi tyfu i fyny gyda'i gilydd - yn Ysgol Eifionydd, Porthmadog ac yn y coleg, felly maen nhw'n adnabod ei gilydd yn dda.
Yn ystod y rhaglenni cyntaf, bydd Elen a Gethin yn dilyn criw Clwb Ffermwyr Ifanc ar drip i Lundain ac yn mwynhau rhagflas o Ŵyl Bang Bangor. Byddant hefyd yn ymuno â'r actor Rhys Ifans wrth iddo saethu ei ffilm newydd am fywyd cythryblus y Cymro Howard Marks yn Alicante, Sbaen.
Elin Fflur, Ginge a Cello Boi a Gwibdaith Hen Fran fydd ymysg yr artistiaid sy'n darparu'r gerddoriaeth yn y rhaglenni cyntaf a'r DJ Daf Du fydd yn cadw cwmni i'r ddau yn y stiwdio.
Fe fydd rhai o enwogion Cymru yn cael eu cyfweld mewn ffordd dra wahanol - yng nghefn tacsi. Michael Williams yw'r gyrrwr tacsi o Fethesda fydd yn holi rhai o wynebau blaenllaw Cymru, gan ddechrau gyda'r bersonoliaeth radio, Jonsi.
© 2010 S4C
O Gymru / Made in Wales