Mae'r tri amigo - Jonathan Davies, Rowland Phillips a Nigel Owens - yn ôl ar drothwy gêm hollbwysig Cymru yn erbyn Lloegr ym Mhencampwriaeth y Chwe Gwlad, i gyflwyno'r gyfres Jonathan ar ei newydd wedd. Ac mae yna gyflwynydd newydd yn ymuno â'r bois i gadw trefn arnyn nhw.
Alex Jones, cyflwynydd adnabyddus cyfres wyliau Tocyn, a llu o gyfresi plant S4C, fydd yn edrych ymlaen at gemau'r Chwe Gwlad yng nghwmni'r tri gŵr doeth mewn cyfres saith rhan.
"Mae cael ymuno â'r tîm yn fraint ar ôl bod yn ffan o'r gyfres am flynyddoedd," esbonia Alex.
"Mae rhaglen Jonathan yn rhan o hwyl y gemau rhyngwladol yn ein tŷ ni. Bydd yn dipyn o sialens rwy'n siŵr ac rwy'n disgwyl bach o dynnu coes gan y bois ar y dechrau, ond nai drio fy ngore i gadw trefn arnyn nhw."
Yn y rhaglenni, bydd Jonathan, Rowland a Nigel yn dangos eu hochr gystadleuol wrth iddyn nhw roi tro ar sialensiau corfforol bob wythnos fydd yn dangos p'un o'r tri yw'r gryfa' a phwy sydd yn loncian tu ôl.
Yn y rhaglen gyntaf, bydd y tri yn mentro i'r dŵr wrth iddyn nhw rasio cychod ar Afon Taf. Yn yr ail raglen, bydd Jonathan, Rowland a Nigel yng Nghlwb Golff Bro Morgannwg - nid i chwarae golff ond i herio'i gilydd mewn ras bygis golff.
Yn ogystal, bydd Jonathan a'r criw yn sgwrsio â'r gwesteion, gan gynnwys yn y rhaglen gyntaf, yr actor Julian Lewis Jones - sy'n ymddangos yn ffilm newydd Clint Eastwood, Invictus. Bydd digon o sgetsys hefyd a bydd yr eitem hynod boblogaidd 'Ar y Pyst' yn dychwelyd.
Mae dydd Gwener yn ddiwrnod mawr i Julian Lewis Jones am resymau eraill. Yn ogystal ag ymddangos ar raglen Jonathan, mae ei ffilm, Invictus, sy'n olrhain hanes Cwpan y Byd 1995 yn Ne Affrica, yn cael ei ryddhau a gwelir Julian yn perfformio ochr yn ochr â chewri Hollywood, Morgan Freeman a Matt Damon.
© 2010 S4C
O Gymru / Made in Wales