Yn y gyfres newydd o Byd o Liw, bydd 12 artist cyfoes yn creu darluniau newydd o gestyll Cymru trwy lygaid yr unfed ganrif ar hugain. Ymlith y cestyll dan sylw mae cestyll Cymreig Dolbadarn a Dinas Brân, a chestyll Normanaidd Rhaglan, Caernarfon a Harlech.

Ym mhob rhaglen, cawn weld darluniau adnabyddus o'r lleoliadau, ac yna bydd dau artist yn creu eu dehongliad nhw o'r castell a'r tirlun o'r newydd.

Osi Rhys Osmond, yr artist o Lansteffan, Sir Gaerfyrddin, sy’n arwain y daith fentrus artistig i fyd y cestyll. Osi fydd yn ein tywys trwy hanes y lluniau gwreiddiol hefyd.

Ymhlith yr arlunwyr sy'n cyfrannu at y gyfres mae enwau cyfarwydd Aneurin Jones ac Ogwyn Davies, a dawn newydd megis Elin Huws a Luned Rhys Parry.