Cafodd hogia’ Clwb Pêl-droed Llanberis sesiwn hyfforddi gwahanol iawn i’r arfer ddechrau mis Mai, pan ddaeth hyfforddwr Cymru, Chris Coleman i’w harwain nhw drwy’r ymarferion. 

Roedd y sesiwn yn cael ei ffilmio ar gyfer cyfres newydd CPD Clwb Pêl-droed Malcs ar S4C. Mae’r camerâu wedi treulio blwyddyn yng nghwmni cymeriadau lliwgar Clwb Pêl-droed Llanberis wrth i’r cyn-chwaraewr proffesiynol a sylwebydd Sgorio, Malcolm Allen, helpu’r clwb yn ystod y tymor. 

Ar nos Wener, 3 Mai, treuliodd Chris Coleman awr ar y cae gyda’r tîm, ac i ddilyn roedd sesiwn ‘holi ag ateb’ yn y ganolfan leol, ble roedd cyfle i unrhyw un ofyn unrhyw beth i’r rheolwr rhyngwladol. Roedd rheolwr Llanberis, Terry Saynor yn falch iawn o gael croesawu Chris i glwb Llanberis. 

“Dwi’n meddwl ei fod o’n beth da ei fod o wedi dod i Llanbêr ‘ma, yn enwedig i’r plant iau gafodd dynnu eu llunia efo fo. Buodd o’n gneud un neu ddau o drills hyfforddi efo’r prif dîm ac mae’n rhaid eu bod nhw wedi dysgu rhywbeth achos mi aethon ni ‘mlaen i guro’r gelyn mawr Llanrug, o ddwy gôl i ddim ddydd Sadwrn!” meddai Terry, sydd wedi rheoli tîm Llanberis ers dwy flynedd ond mae cysylltiad ei deulu â’r clwb yn estyn nôl dros genedlaethau. 

Mae Malcolm Allen yn dweud fod y tîm wedi bod yn ffodus iawn i fanteisio ar y sesiwn hyfforddi. 

“Dydi Chris byth yn gwneud sesiynau hyfforddi efo timau eraill, felly roedd hwn yn gyfle prin i’r hogia’ ddysgu ganddo fo. Roedd pob un one jack ohonyn nhw yn hongian ar bob gair oedd gan Chris i’w ddweud. Dwi ‘rioed wedi gweld nhw’n canolbwyntio fel ‘na efo fi!” meddai Malcolm. 

I goroni’r tymor, ar nos Wener 17 Mai, bydd Clwb Pêl-droed Llanberis yn cynnal gêm arbennig gyda sêr y tîm o’r gorffennol yn herio’r tîm presennol ar y cae. Yn eu plith, mae Malcolm ei hun fu’n chwarae i glwb Llanberis yn ei arddegau. 

“Iwan, tad Mark ‘Jiws’ Lloyd Williams, sy’n trefnu tîm ‘sêr y gorffennol’, a fo oedd y cynta’ i fy arwyddo i fel chwaraewr yn 15 oed pan es i chwarae i Lanberis am £5!” meddai Malcolm, sy’n edrych ymlaen at y gêm. “Dwi ddim yn siŵr os medra i chwarae’r 90 munud, byddai’n lwcus i gael 45 munud cyn i’r benglin roi fewn. Ond wrth gwrs dwi’n edrych ‘mlaen. ‘Sna’m byd gwell na bod allan ar y cae.” 

Mae croeso i bawb ddod i wylio’r gêm yn Llanberis nos Wener 17 Mai. Bydd y gêm yn dechrau tua 6.30 ac mae mynediad yn rhad ac am ddim. 

CPD Clwb Pêl-droed Malcs yn dechrau nos Iau 6 Mehefin.

Gyda’r mwgwd a’r clustffonau yn eu lle – ac mae cystadleuydd arall yn barod i chwarae Sion a Siân 

Bob wythnos mae dau gwpwl yn cystadlu am y wobr fawr o £1,000. 

Stifyn Parri a Heledd Cynwal sy’n cyflwyno Sion a Siân ac maen nhw’n addo fod rhagor fyth o hwyl ar y ffordd yn y gyfres hon wrth i ni gael cipolwg ar fywydau cyplau o bob rhan o Gymru.

“Cafodd Heledd a finnau gymaint o hwyl ar y gyfres hon, roedd yr awyrgylch yn y stiwdio fatha parti. Mi roedd y cyplau i gyd yn gymeriadau difyr tu hwnt ac roedd ‘na gymaint o chwerthin, roedd hi fatha ffair!” meddai Stifyn.

Sion a Siân, bob nos Sadwrn 9.30 

Gwylio ar Clic

Ond wrth i’r ddrama barhau rydyn ni’n dod i wybod mwy am gyfrinachau Louise. Yr actores Sara Lloyd sy’n esbonio.  

Pa fath o berson ydi Louise? 

Mae Louise yn berson fysa pobl ddim yn sylwi arni’n syth. Mae hi’n hawdd anghofio amdani a dyna sydd wedi digwydd iddi ar hyd ei bywyd. Fe gollodd Louise ei mam pan roedd hi’n 16 oed, ac fe fuodd ei thad ail-briodi yn fuan wedi hynny. Cynorthwyo disgybl sydd ag anghenion arbennig ydy ei gwaith yn Ysgol Bro Taf, er mai athrawes roedd hi eisiau bod go iawn.  

Dydi Louise ddim yn cymdeithasu gydag athrawon ifanc yr ysgol, ond mae ganddi hi un ffrind. 

Pan mae Gwen Lloyd, yr athrawes Addysg Grefyddol, yn dechrau dangos diddordeb yn ei bywyd, mae hynny yn rhywbeth anferthol i Louise. Mae hi’n chwilio am gariad mam, ac mae hi’n cael hynny i ryw raddau gan Gwen. Does gan Gwen a Geraint ddim plant eu hunain, ac mae Gwen mor hoff o ofalu am bobl ac mae hi mor frwdfrydig. Mewn ffordd mae Louise yn llenwi bwlch yn ei bywyd hithau hefyd, ac mae’r ddwy wedi closio fwy fyth ers i Louise ddweud wrth Gwen fod ganddi gancr. 

Cyfrinach rhwng y ddwy oedd y salwch i fod, ond erbyn hyn mae pawb yn gwybod. Pam fod Louise yn teimlo mor anghyfforddus gyda’r sylw? 

Mae hyn yn hunllef i Louise. Mae’n gas ganddi hi bobl yn teimlo bechod drosti hi, a dyna sydd wedi digwydd iddi ar hyd ei bywyd. Ond ar y llaw arall, sylw ydy’r union beth mae hi’n chwilio amdano. 

A fydd Louise yn ein synnu ni erbyn diwedd y gyfres? 

Heb ddatgelu gormod am ei chyfrinachau, mae dipyn mwy i stori Louise nag yr oedden ni wedi tybio ac y byddwn ni’n edrych arni mewn ffordd dra gwahanol erbyn diwedd y gyfres! 

Gwaith/Cartref, bob nos Sul 9.00

Hefyd nos Fercher 10.00 gydag isdeitlau Saesneg ar y sgrin

Gwefan Ysgol Gyfun Gymraeg Bro Taf  

Facebook   #gwaithcartref

Nia Parry a Matt Johson fydd yn cyflwyno’r gyfres trwy gydol yr wythnos gyda rhaglenni yn nosweithiol. Bydd yr wythnos yn dechrau gyda dwy raglen i ddod i adnabod y deg dysgwr ar nos Fercher, 15 a nos Wener, 17 Mai am 8.25pm, ac yna bydd y gyfres yn dechrau nos Sul, 19 Mai gyda’r noson derfynol i gyhoeddi’r enillydd nos Wener, 24 Mai a rhaglen uchafbwyntiau nos Sadwrn, 25 Mai.

Y deg fydd yn ymddangos ar cariad@iaith:love4language 2013 yw:

Ryan Quick o Bort Talbot; Sa’ipolu Uhi o Tonga sy’n byw yng Nghaerdydd; Cisa Borsey o Ddinbych; Danielle Thomas o Wrecsam sy’n byw yn Llangefni; Sarah Hattle o Lee-on-the-Solent yn Hampshire; Alun Rhys Jones o Brestatyn; Tom Workman o’r Eglwys Newydd, Caerdydd; Liz Roberts o Gastell-nedd sy’n byw yng Nghaerdydd; Ludo Dieumegard o Lydaw sy’n byw yn Henllan ger Llandysul, a Gayle Lister o Reading sydd bellach yn byw ym Mhenfro.

I ddarllen mwy am y dysgwyr cer i s4c.co.uk/cariadatiaith

Mae’r deg yn dod o wahanol ardaloedd o Gymru a thu hwnt, a phob un â’i reswm ei hun dros eisiau dysgu’r iaith.

Bydd y camerâu’n dilyn y dysgwyr yng ngwersyll Manorafon sydd yn swatio rhwng Tresaith a Llangrannog. Byddant yn derbyn pedair awr o wersi Cymraeg yn ddyddiol dan arweiniad y cyflwynydd a’r tiwtor Cymraeg Nia Parry, a’r tiwtor Cymraeg profiadol Ioan Talfryn.

Bydd y deg hefyd yn cymryd rhan mewn heriau amrywiol eraill ond chân nhw ddim gwybod beth sydd o’i blaenau nes iddynt gyrraedd yno.

Mae Nia Parry sy’n enedigol o Ynys Môn ond a fagwyd yn Llandrillo yn Rhos ym Mae Colwyn yn edrych ymlaen at y sialens eto eleni.

“Maen nhw’n griw mor neis, ac mae ‘na amrywiaeth ddifyr o gymeriadau. Un sy’n hoffi cerddoriaeth, un cymeriad tadol, un hogan ifanc fywiog…’da ni’n mynd i gael llawer o hwyl!” meddai’r gyflwynwraig a’r fam i ddau sy’n rhoi gwersi Cymraeg i ddysgwr ers un mlynedd ar bymtheg bellach.

“Mae gan rai tipyn mwy o Gymraeg nac eraill, ac mi fydd hynny yn her i ni fel tiwtoriaid hefyd, ond taith bersonol bob un fydd yn bwysig.” 

Dyma’r chweched gyfres o cariad@iaith:love4language a gynhyrchir gan gwmni Fflic sy’n rhan o Boom Pictures Cymru.

Wyth o enwogion fu’n ymgymryd â sialens cariad@iaith y llynedd. Roedd y canwr opera Wynne Evans, y gyflwynwraig newyddion Lucy Owen a’r gantores Lucie Jones ymysg yr wyth, ond wedi wythnos o wersi dwys a chyfres o dasgau heriol coronwyd Gareth ‘Alfie’ Thomas yn enillydd y gyfres.

I dderbyn y wybodaeth ddiweddaraf am y gyfres hoffwch cariad@iaith:love4language ar Facebook a dilynwch @s4cariad ar Twitter.

Eisteddfod yr Urdd yn Sir Benfro, y Sioe Amaethyddol Frenhinol yn Llanelwedd a’r Eisteddfod Genedlaethol yn Sir Ddinbych – mi fydd yn haf i’w gofio i blant o bob rhan o Gymru.

Ym mhob un o’r digwyddiadau bydd Cyw yn perfformio’n fyw gyda chyflwynwyr y gwasanaeth a rhai o gymeriadau poblogaidd rhaglenni Cyw fel Dona Direidi, Ben Dant a Dwylo’r Enfys, mewn perfformiadau dyddiol a sesiynau dawnsio a chanu.

Yn ogystal â hyn bydd criw Cyw hefyd yn ymddangos yng ngŵyl Tafwyl yng Nghaerydd, Ngŵyl Gyhoeddi Sir Gar ac yn nigwyddiad Hwyl a Halibalŵ Cymry Llundain.

I’r plant hŷn, bydd ‘na gemau gwirion yng nghwmni Anni, Lois, Tudur ac Owain – cyflwynwyr Stwnsh yn Eisteddfod yr Urdd, yn y Sioe Frenhinol ac yn yr Eisteddfod Genedlaethol hefyd.

Manylion y digwyddiadau cenedlaethol:

• Eisteddfod Genedlaethol Yr Urdd, Sir Benfro
  Dydd Llun 27 Mai – Dydd Sadwrn 1 Mehefin 2013
  Fferm Cilwendeg ger Boncath
• Gŵyl Tafwyl
  Dydd Sadwrn 15 Mehefin 2013
  Castell Caerdydd
• Y Sioe Frenhinol
  Dydd Llun 22 – Dydd Iau 25 Gorffennaf 2013
  Llanelwedd, Llanfair ym Muallt
• Eisteddfod Genedlaethol Cymru Sir Ddinbych a’r Cyffiniau 2013
  Dydd Sadwrn 3 Awst – Dydd Sadwrn 10 Awst 2013
  Ffordd Eglwys Wen, Dinbych

Trefnir y noson fel rhan o ymgyrch Cymuned S4C sy’n cynnal sawl digwyddiad yn yr ardal er mwyn clywed barn pobl am raglenni a gwasanaethau S4C. 

Bydd Ian Jones, Prif Weithredwr y Sianel a Chadeirydd yr Awdurdod S4C, Huw Jones yno i sgwrsio ac i wrando ar farn a sylwadau’r bobl leol. 

Mae’r noson i ddechrau am 7.00 a bydd lluniaeth ysgafn yn cael ei ddarparu. 

Am wybodaeth bellach cysylltwch â Gwifren Gwylwyr S4C ar 0870 600 4141 neu gwifren@s4c.co.uk   

Darperir system ddolen sain ac offer cyfieithu

Dylan Ebenezer sy’n cyflwyno yng nghwmni John Hartson a Dai Davies. Yn y blwch sylwebu mae Nic Parry a Malcolm Allen.

Mae pobl yn dweud fod yna hud yn perthyn i Gwpan Cymru. Wyt ti’n cytuno?

Yn bendant, mae ‘na hanes anhygoel i’r gystadleuaeth yn mynd yn ôl 125 o flynyddoedd. Ac mae’n golygu llawer i’r clybiau a’r cefnogwyr hefyd. Does neb yn hapus gyda gêm gyfartal felly mae’r gemau yn fwy cyffrous. Drama o’r dechrau i’r diwedd. 

A fydd Bangor yn diodde’ dan y pwysau i ennill y Gwpan a’r tocyn i Ewrop?

Mae Bangor yn hen gyfarwydd â’r achlysuron mawr. Bydd ceisio ennill y Gwpan yn hen ddigon o abwyd cyn meddwl am Ewrop. Mae ganddyn nhw record wych yng Nghwpan Cymru wedi iddyn nhw ennill teirgwaith yn olynol rhwng 2008 a 2010. 

Mae hi’n gêm bwysig iawn i Brestatyn hefyd wrth gwrs.

Dyma’r tro cyntaf i’r clwb gyrraedd y rownd derfynol, felly ennill y Gwpan yw popeth iddyn nhw. Maen nhw wedi adeiladu’n raddol yn ystod y tymhorau diwethaf ac yn haeddu pob clod. 

Wyt ti am fentro dyfalu’r sgôr?

Bydd hi’n bendant yn agos iawn. Mae dwy o’r gemau rhwng y ddau dîm y tymor yma wedi gorffen yn gyfartal – gyda sgôr 3-3! Mae Bangor a Phrestatyn wedi ennill un gêm yr un hefyd, felly does dim llawer yn eu gwahanu. 

Dwi ddim yn mynd i broffwydo’r sgôr, ond fyddwn i ddim yn cael sioc tase rhaid cael amser ychwanegol, a chiciau o’r smotyn. 

Sgorio: Cwpan Cymru: Bangor v Prestatyn

Prynhawn Llun 6 Mai 2.30 

Gwefan Sgorio     Facebook     @sgorio

Mae Margaret: Ddoe a Heddiw yn gyfres newydd o gerddoriaeth, adloniant a sgwrs sy’n dechrau ar S4C nos Sadwrn 20 Ebrill am 9.00pm, ac mae’r gyfres wyth rhan wedi ei ffilmio yn Llwyn Helyg.

I nodi dechrau’r gyfres newydd hon mae S4C a’r Daily Post yn cynnig tair noson o wely a brecwast yno mewn cystadleuaeth arbennig.

Mae’r plasty yn gyfuniad o’r clasurol a’r modern, gyda gwlâu arbennig ‘And So To Bed’ ym mhob ystafell, bath jacuzzi ym mhob ystafell ymolchi, ystafell gerddoriaeth arbennig a gerddi ysblennydd i bob cyfeiriad.

I ddarllen mwy am blasty Llwyn Helyg ewch i wefan y plasty: llwynhelygcountryhouse.co.uk 

I fod â chyfle i ennill y wobr y cwbl sydd rhaid i chi wneud yw ateb y cwestiwn canlynol:

Pa fath o gerddor oedd y dalent ifanc newydd fu’n ymddangos yn rhaglen gyntaf cyfres newydd Margaret: Ddoe a Heddiw?

1. Canwr
2. Pianydd
3. Trympedwr

Gallwch wylio pennod nos Sadwrn ar s4c.co.uk/clic

I lenwi ffurflen gystadlu ar lein ac i weld y telerau ac amodau llawn ewch i s4c.co.uk/margaret.

Pob lwc!

Bydd sioe Cyw yn cael ei chynnal dair gwaith yn ystod y dydd gan y pedwar cyflwynwydd: Rachael, Gareth, Einir a Trystan, a bydd cymeriad poblogaidd Dona Direidi yn cynnal sesiynau dawnsio hefyd!

Bydd helfa drysor Cyw o gwmpas y fferm i’r rhai bach, gyda chyfle i ennill hamper fawr o nwyddau Cyw, neu beth am gymryd rhan yn helfa cardiau Cyw, lle bydd cyfle i ddod o hyd i gardiau Cyw ar hyd y fferm er mwyn ennill gwobr!

Am wybodaeth teithio a phrisiau, ewch i gael golwg ar wefan Folly Farm: http://www.folly-farm.co.uk/

Croeso i bawb!