Gan fod Rasus Ceredigion wedi eu canslo, ar ddydd Sadwrn 7 Gorffennaf, oherwydd y glaw, bydd tîm Rasus yn darlledu’n fyw o Dairgwaith yn lle.
Mae dal cyfle i chi ennill £500 Ras am Rif felly ewch i wefan Rasus i gofrestru.
Ar ôl ei phrofiad cyntaf yn sylwebu’n fyw ar Rasus o Dairgwaith ym mis Mehefin, mae Megan yn edrych ymlaen at ddychwelyd yno i sylwebu am yr eildro.
Sut brofiad oedd sylwebu yn fyw ar Rasus am y tro cyntaf?
Roeddwn i’n petrified cyn mynd ar y meic yn Nhairgwaith. Doedd gen i ddim syniad beth i’w ddisgwyl! Er bod gen i nodiadau o fy mlaen mi roedd y rhan fwyaf wedi dod o dop fy mhen.
Roedd Wyn Gruffydd, fy nghyd sylwebydd, yn wych. Roedd yn help i mi ymlacio felly yn y diwedd fe wnes i fwynhau. Dwi’n siŵr y bydd Ray yn rhoi’r un gefnogaeth i mi y tro yma.
Cyn i’r digwyddiad gael ei chanslo, roedd Megan Taff yn edrych ymlaen at Rasus Ceredigion ac i sylwebu ar ras Feinal Clasur Ceredigion.
Ddeng mlynedd yn ôl, enillodd Megan y teitl gan yrru’r ceffyl Merry Baron, un o geffylau ei chyd-sylwebydd Ray Jenkins.
Beth wyt ti’n cofio am y diwrnod hwnnw nôl yn 2002?
Mae gen i atgofion melys iawn o’r diwrnod hwnnw. Roedd Ray wedi gofyn i mi yrru ac roedd yna eitha’ siawns y baswn i’n gwneud yn dda, ond doedden ni ddim yn disgwyl ennill o gwbl!
Roedd hi’n ddiwrnod eithriadol o braf. Mi enillais i’r heat a phawb yn falch iawn o hynny ond wedyn pan ddaeth y ffeinal mi wnaeth popeth ddisgyn i’w le. Dwi’n cofio rasio lawr yr home straight a Ray yn neidio i fyny ac i lawr wrth ei fodd!
Roedd o’n neis bod rhywun lleol wedi ennill, a rhywun oedd wedi bod wrthi ers sbel hefyd. Roedd o’n brofiad gwych.
Sut mae Rasus Ceredigion wedi newid er hynny?
Dim ond diwrnod o hyd oedd Rasus Ceredigion ddeng mlynedd yn ôl. Ond diolch i waith diflino gan y pwyllgor mae’r ŵyl wedi tyfu i fod yn dridiau o rasio penigamp sy’n denu dros 300 o geffylau o bob cornel o’r Deyrnas Unedig i gystadlu.
Mae’r pwyllgor wedi gweithio yn galed yn y blynyddoedd diwethaf i wella’r trac ac i hyrwyddo’r digwyddiad, a’r cwbl yn ddi-dâl.
Roedd hi’n fraint mawr ennill y wobr nôl yn 2002, ond oherwydd twf y digwyddiad mae’n fraint hyd yn oed yn fwy erbyn hyn.
Yn anffodus, oherwydd y glaw trwm, bydd neb yn rasio yng Ngheredigion y penwythnos hwn. Ond bydd digon o gyffro i’ch diddanu yn fyw brynhawn Sadwrn o Dairgwaith.
Rasus Tairgwaith, Sadwrn 7 Gorffennaf 5.30pm
Cofiwch gofretru am y cyfle i chi ennill £500 yn y gystadleuaeth Ras am Rif.