Dudley Newbery
Ar ôl gorffen recordio Casa Dudley llwyddiannus yn Yr Eidal llynedd mae bywyd wedi bod yn brysur iawn.
Ym Mis Rhagfyr fe ddechreuodd y gwaith o edrych am leoliad yn Sbaen ar gyfer y gyfres newydd eleni. Rioja a Navara oedd yr ardaloedd cynta' i mi ymweld â nhw, ardaloedd sy'n enwog am eu gwinoedd bendigedig a'u bwydydd rhanbarthol blasus.
Dechrau'r flwyddyn, mwy o deithio, mwy o fwyd a gwin! Bum yn ymweld ag ardaloedd Malaga, Ronda, Catalwnia a Sanlucar de Barameda, cyn dod o hyd i leoliad perffaith i Casa Dudley, yn ardal fynyddig, brydferth Ronda yn Andalucía.
Dyna'r lleoliad wedi ei drefnu am y tro.
Mis Mawrth fe ddechreuodd cystadleuaeth goginio'r Urdd, a'r rowndiau cyntaf yn cymryd lle mewn amryw o ysgolion o gwmpas Cymru.
Bu'r gystadleuaeth yn llwyddiant ysgubol gyda phlant led led Cymru'n cymryd rhan.
Eto eleni roeddwn yn rhan o dîm o arbenigwyr bwyd oedd yn beirniadu cystadleuaeth y Great Taste Awards, yn Llundain.
Yng Nghymru bum yn feirniad ar gyfer Gwir Flas, ac yn Nulyn roeddwn ymhlith y beirniaid yng Nghystadleuaeth Caws y Byd.
Profiadau pleserus tu hwnt, er tydi nhw ddim wedi gwneud lot o les i siâp fy nghorff!
Un digwyddiad sydd wastad werth ymweliad ydi Gŵyl Bysgod Aberaeron, cyfle i goginio pysgod ffres, mor ffres mae ambell bysgodyn yn dal i symud! Os nad ydych chi wedi bod o'r blaen, ewch flwyddyn nesa, mae e werth y siwrne.
Mae nifer o ddigwyddiadau hyrwyddo Casa Dudley wedi digwydd eto eleni gyda S4C wedi trefnu arddangosfeydd coginio led led Cymru, y ddiwethaf yng Ngŵyl Fwyd Llangollen ganol mis Hydref. Cefais gyfle hefyd i goginio paëla i 300 o bobl yn yr Eisteddfod Genedlaethol yng Nghaerdydd eleni!