Bydd Huw Evans a Huw Stephens yn cyflwyno pob rhaglen o lwyfan digwyddiad arbennig Bandit yn Gigio mewn chwe lleoliad yng Nghymru. Byddan nhw'n dechrau yn Neuadd Hendre, ger Bangor, ble bydd cerddoriaeth gan Colorama, Violas a Cloud4mations.
Bydd pob rhaglen yn fwrlwm o gerddoriaeth fyw gan rai o fandiau ac artistiaid mwyaf y Sîn Roc Gymraeg, ynghyd â golwg gyffredinol a chyffrous dros y newyddion diweddaraf - y bandiau, digwyddiadau a'r lleoliadau. Yn y rhaglen gyntaf hefyd bydd eitem arbennig yn canolbwyntio ar enillwyr gwobrau Selar, a phroffil o Violas.
O Neuadd Hendre bydd y daith yn mynd â ni i Eisteddfod Ryng-golegol Caerdydd, Undeb Myfyrwyr Y Drindod Dewi Sant Caerfyrddin, Central Station Wrecsam, Neuadd Pantycelyn Aberystwyth, a Cell Blaenau Ffestiniog. Bydd tri artist yn perfformio ym mhob digwyddiad ac yn eu plith mae Yr Ods, Race Horses, Cowbois Rhos Botwnnog, Mr Huw, Masters in France, Plyci a Jen Jeniro.
Mae Huw Stephens wedi mwynhau cynnal digwyddiadau Bandit yn Gigio a'r cyfle i ymweld â chymunedau ym mhob rhan o Gymru.
"Mae Neuadd Hendre yn lleoliad arbennig ac roedd gweld Colorama yna yn wych," meddai Huw Stephens, sydd hefyd yn un o brif gyflwynwyr BBC Radio 1.
"Mae'r Rhyng-gol hefyd wastad yn barti enfawr. Mae'n dod â myfyrwyr Cymru at ei gilydd i gael un noson anferth sy'n sicrhau fod gigs y Rhyng-gol wastad yn fythgofiadwy. Roedd y bandiau oedd yn chwarae yn wych eleni!"
Bydd Bandit yn Gigio yn dychwelyd ar gyfer pennod arbennig o Eisteddfod Genedlaethol Wrecsam a'r Fro ym mis Awst 2011.
© 2012 S4C
O Gymru / Made in Wales