Derbyniodd y pianydd o Bentrebychan ger Wrecsam, Llŷr Williams, wahoddiad pwysig iawn yn gynharach eleni. Gwahoddiad personol gan bwysigion Neuadd Carnegie yn Efrog Newydd i berfformio yno.
Dim ond pedwar o gerddorion disglair y byd sy'n derbyn gwahoddiad o'r fath bob blwyddyn, ac yn y rhaglen Llŷr yn Carnegie yr wythnos hon, a gyflwynir gan Beti George, cawn ei weld yn perfformio ar lwyfan y neuadd enwog.
Cawn glywed mwy am hanes rhyfeddol Neuadd Carnegie, sydd wedi llwyddo i ddenu mawrion cerddorol y byd dros y blynyddoedd megis Caruso, Casals, Mahler, Rachmaninov, Pavarotti a Bryn Terfel. Cawn hefyd fod yn rhan o'r gynulleidfa mewn cyngerdd arbennig yn un o westai moethus Efrog Newydd i ddathlu Dydd Gŵyl Dewi.
Yn y gyngerdd 'Cymru yn America' a drefnwyd gan Lywodraeth y Cynulliad, rhoddodd Llŷr première byd i waith gan Karl Jenkins o'r enw Madog. Perfformiodd hefyd weithiau gan Chopin, Schubert a Debussy.
Ar gyfer ei début yn Neuadd Carnegie, dewisodd Llŷr ei raglen yn ofalus, er mwyn dangos ei ddawn ar ei orau. Yn yr hanner cyntaf cawn glywed weithiau gan Schubert a Debussy ac yna yn yr ail hanner, mae'n perfformio Darluniau mewn Arddangosfa gan Mussorgsky.
Yn y rhaglen hon, Llŷr ei hun sy'n esbonio'r cefndir y tu ôl i wahanol rannau'r gwaith er mwyn rhoi darlun cyflawn inni o gampwaith Mussorgsky.
Mae'r gynulleidfa yn dangos eu gorfoledd hwythau gan sefyll ar eu traed i gymeradwyo'r Cymro sy'n gwneud enw iddo ei hun ar draws y byd. Peth anarferol iawn yw gweld cynulleidfa yn Neuadd Carnegie yn sefyll ar eu traed mewn edmygedd.
© 2010 S4C
O Gymru / Made in Wales