Gyda Jonathan Davies, Llinos Lee a Dewi 'Pws' Morris wrth y llyw, mae'r gyfres yn cyflwyno uchafbwyntiau Cylchdaith Ryngwladol Ewrop a PGA yr Unol Daleithiau.
Yn ogystal, mae uchafbwyntiau o Gylchdaith Ewropeaidd y Merched. Mae'r criw hefyd yn ymweld ag amryw o glybiau golff ar draws Cymru, lle bydd cyfle i daclo'r diawl o dyllau a chwrdd â chymeriadau lliwgar y gamp.
Er bod Jonathan yn fwy adnabyddus ar y cae rygbi, dyw e ddim yn gyfrinach fawr ei fod yn mwynhau treulio oriau di-ri ar y cwrs golff yn gwella ei swing.
"Dwi wedi bod yn ddilynwr brwd o'r gêm ers blynyddoedd, fel chwaraewr amatur a gwyliwr," esbonia Jonathan.
"Mae yna rywbeth arbennig iawn am y gamp ac mae cyfeillgarwch a hwyl yn elfennau pwysig iawn.
Flwyddyn nesa bydd Cymru'n croesawu'r Cwpan Ryder i'r Celtic Manor yng Nghasnewydd am y tro cyntaf erioed. Fe fydd S4C yn darlledu uchafbwyntiau nosweithiol o'r gystadleuaeth fawr rhwng golffwyr Ewrop a'r Unol Daleithiau.
"Does dim amheuaeth y bydd blwyddyn nesaf yn gyfnod cyffrous iawn i golff - a chwaraeon - yng Nghymru. Bydd llygaid y byd ar y Celtic Manor ac ar Gymru wrth i ni lwyfannu un o gystadlaethau chwaraeon mwya'r byd," meddai Jonathan.
© 2010 S4C
O Gymru / Made in Wales