Yn ystod munudau ola'r Prawf Cyntaf yn erbyn De Affrica fe feddyliais i am Shaun Edwards. Roedd amddiffyn cadarn Cymru'n edrych yn fregus iawn yn fwya' sydyn. Pe bai'r Springboks wedi llwyddo i groesi am un cais arall, a chyrraedd carreg filltir o 50 o bwyntiau, byddai'r fflam o fewn enaid y dyn o Ogledd Lloegr wedi ffrwydro. Roedd pob cais yn ergyd i'r hyfforddwr balch wrth iddo syllu'n ddiymadferth o'r eisteddle.
Mae uchafbwyntiau'r ail brawf i'w gweld nos Sadwrn 14 Mehefin gydag Eleri Siôn wrth y llyw a Gwyn Jones a Wyn Gruffydd yn sylwebu.
Bydd y daith yn cynnig her o'r radd uchaf i garfan Cymru - nid yn unig y byddan nhw'n dod wyneb-yn-wyneb â phencampwyr y byd, bydd y gemau yn cael eu cynnal dros 5,000 o droedfeddi uwchben lefel y môr, yn Bloemfontein a Pretoria.
Meddai Eleri Siôn "Dim ond Ffrainc a'r Crysau Duon sydd wedi ennill yn Bloemfontein a Pretoria, ond os yw Cymru am efelychu'r ddau dîm yma, dyma'r flwyddyn iddyn nhw fanteisio ar y cyfle. Mae cyfnod o newid ar hyn o bryd yn Ne Affrica gyda hyfforddwr newydd wrth y llyw a thimau hemisffer y de yn arbrofi gyda rheolau newydd felly dyma gyfle euraidd i Gymru.”
"Does 'na ddim gwell amser i drechu'r Springboks 'na nawr! Uchelgais Cymru fydd ennill y gemau prawf gan nad ydyn ni byth wedi trechu De Affrica ar eu tir eu hunain. Bydd disgwyliadau uchel iawn gan ddilynwyr rygbi yng Nghymru hefyd ar ôl i ni gipio'r Grand Slam yn y gwanwyn,” ychwanega'r sylwebydd Wyn Gruffydd.
Mae hi bellach yn ddeng mlynedd ers i Gymru colli yn erbyn y Springboks, 96-13. Dyma'r cyfanswm uchaf o bwyntiau erioed i gael eu sgorio mewn gêm yn erbyn Cymru. Ydy Wyn yn credu y bydd atgofion cas yn llifo 'nôl wrth i Gymru baratoi at y gemau prawf yma?
"Rwy'n credu bydd yr atgof yn ysbrydoli'r garfan yn fwy. Yr unig un yn y garfan fydd ag atgofion chwerw o'r diwrnod yna yw Stephen Jones a ddaeth ymlaen fel eilydd am y tro cyntaf yn y gêm honno. Ond fe yw un o'r chwaraewyr mwyaf dylanwadol a phrofiadol sydd â'r gallu i hybu Cymru a sicrhau buddugoliaeth.”
Er bod Wyn yn meddwl bod gan Gymru siawns dda yn erbyn y Springboks, mae'n credu bod yn rhaid i ni ennill y prawf cyntaf os am ennill yr ail.
"Mae yna siawns go dda i Gymru os wnawn ni ennill y prawf cyntaf ond os na, rwy'n ofni y bydd De Affrica yn ennill y ddau,” ychwanega Wyn, sydd hefyd yn sylwebu ar y gyfres Rasus ar Garlam a ddarlledir bob nos Lun.
© 2008 S4C
O Gymru / Made in Wales