Beth sy'n poeni Eurof?
"Mae Eurof yn berson sy'n poeni am bob dim dan haul," meddai Matthew Gravelle, yr actor 32 oed sy'n chwarae rhan yr athro Cymraeg diniwed yn Con Passionate ar S4C.
Ac yntau'n paratoi i briodi Lara, merch ei freuddwydion, sy'n feichiog â'i blentyn, fe ddylai fod wrth ei fodd. Ond mae Eurof, sy'n aelod o Gôr Meibion Gwili yn y gyfres ddrama boblogaidd, yn poeni am bopeth.
Mwy »
"Mae Eurof yn becso am y briodas, yr enedigaeth a'r negeseuon mae'n derbyn ar ei ffôn. Ym mhob cyfres mae Eurof yn meddwl ei fod e'n mynd yn nyts - ond poeni am gymaint o bethau sy'n ei hala'n wallgo'. Mae e'n disgwyl y gwaetha' bob tro," eglura Matthew, sy'n briod â'r actores Mali Harries, sy'n chwarae rhan Kate yn Caerdydd.
Er hyn, ei wendidau sy'n gwneud y cymeriad yn gymaint o bleser i'w chwarae yn ôl Matthew.
"Rwy wedi dwli actio Eurof, ac yn mwynhau ei wendidau gan fod cymaint ohonyn nhw! Mae'n hollol wahanol i Lyn, fy nghymeriad yn Y Pris, sy'n llawn hunan hyder."
Ond wedi chwarae'r cymeriad am dair cyfres, fe sylwodd Matthew ei fod yntau'n dechrau troi'n drwsgl yn sgil actio rhan Eurof.
"Wedi cyfnod o ffilmio, roeddwn i'n baglu dros bethau ac yn bod yn lletchwith iawn yn gyffredinol. Ond, wnaeth hynny ddim para'n hir, diolch byth!" eglura.
Gyda diflaniad Ian yn parhau i beri dryswch i bawb yn y côr, Glesni'n gadael Maldwyn am Glyn a chyfeilyddes newydd yn dod i gymryd lle Brian - a gaiff Eurof a Lara siawns i fyw'n hapus eto fyth, neu a oes rhywun yn benderfynol o roi stop ar eu diwrnod mawr?
« Llai
Cyfweliad gyda Shân Cothi
Magwyd Shân Cothi ym mhentref Ffarmers yn Sir Gaerfyrddin. Mae wedi teithio'r byd fel un o sopranos mwyaf adnabyddus Cymru, ac mae yn ôl ar ein sgrin fel yr arweinydd enigmatig Davina Roberts yn y ddrama boblogaidd, Con Passionate. Yma, mae'n siarad am yr ysbrydoliaeth am ei chymeriad, a'i theimladau ynglŷn â derbyn rôl actio arall.
Y Gyfres Newydd
"Ro'n i am adael y gyfres yn ei blas a hynny cyn i fi golli'r plot yn llwyr!" chwardda'r awdures Siwan Jones, wrth sôn am y ddrama boblogaidd Con Passionate, sy'n dychwelyd i'r sgrin nos Sul 26 Hydref, a hynny am y tro olaf.
Wedi diweddglo dramatig y gyfres ddiwethaf a enillodd un o brif wobrau'r byd teledu, y Rose d'Or, mae pawb yn ysu i wybod beth yw hanes Davina, arweinyddes danllyd Côr Meibion Gwili, ac aelodau'r côr a'u teuluoedd.
Ar ddiwedd y gyfres, daeth cyfrinachau tywyll i'r wyneb, gyda'r chwarae yn troi'n chwerw wrth i gymeriadau Irfon a Pete frwydro gyda'u dyrnau dros Davina. Nawr, mae sawl cwestiwn angen ei ateb.
Mwy »
Y gantores opera Shân Cothi sy'n chwarae Davina, gyda William Thomas, Matthew Gravelle a Steffan Rhodri – Dave yn y gyfres gomedi boblogaidd Gavin and Stacey – ymhlith aelodau eraill y cast.
Bydd sawl wyneb newydd yn y drydedd gyfres hon hefyd, gan gynnwys Sara Lloyd Gregory, sydd wedi actio yn Y Pris, Belonging ac yn fwy diweddar, addasiad y BBC o Tess of the D'Urbervilles. Mae Sara yn chwarae Ellen Wynne, cyfeilyddes newydd ifanc a deniadol, sy'n ddigon hapus i herio Davina.
Bydd Rhodri Evan, enillydd gwobr Bafta Cymru 2008 am yr Actor Gorau am ei rôl fel Balders yn y gyfres Cowbois ac Injans, yn chwarae Cecil, cymydog busneslyd Andy a Judith. Aneirin Hughes sy'n portreadu'r merchetwr peryglus, Irfon, yn y gyfres hon.
Bydd y cydblethiad o hiwmor a ffantasi yn elfennau amlwg iawn yn y gyfres, gyda phroblemau bob dydd aelodau'r côr, yn ogystal â'u bywydau carwriaethol, yn rhan o'r ddrama hefyd. Mae 'na fygythiad o streic ar y gorwel a sôn am greu côr cymysg - ond a fydd bywyd yn fiwsig i gyd?
I Siwan Jones roedd y penderfyniad mai hon fyddai'r gyfres olaf yn un anodd ond yn un sicr ar yr un pryd.
"Roedd ysgrifennu'r geiriau 'Y Diwedd' yn brofiad emosiynol, mae'n rhaid dweud, gan fy mod wedi byw gyda'r cymeriadau mor hir ac yn teimlo bod gen i berthynas agos gyda nhw.
"Ond mae yna ddigon o ddrama, ffantasi, canu a chwympo mas yn y gyfres newydd hon i ddiddanu'r gwylwyr gyda chymeriadau newydd hefyd."
« Llai
