Bro
Dod i adnabod Cymru'n well
Mae cyfres newydd Bro ar S4C yn bwrw golwg newydd ar amrywiaeth o fröydd yng Nghymru, gan ddod i adnabod y bobl a'r llefydd sydd wrth galon y gymuned.
Cyflwynwyr
Y naturiaethwr Iolo Williams a'r gantores Shân Cothi fydd yn crwydro Cymru gan fynd o fro i fro i glywed hanesion difyr a chwrdd â phobl ddiddorol.
"Mae gennym ni dreftadaeth naturiol ryfeddol yng Nghymru," meddai Iolo.
"Mae'n treftadaeth hanesyddol, ein pobl a'n cymunedau hefyd yn unigryw ac rwy'n falch o fod yn cyflwyno cyfres sy'n dathlu hynny."
Mae Shân wedi mwynhau croeso a lletygarwch wrth iddi deithio ar hyd a lled y wlad yn perfformio.
"Dros y blynyddoedd, rwyf wedi teithio i bob cwr o Gymru i ganu mewn cyngherddau ac i ffilmio," meddai Shân.
"Rwy'n falch o'r cyfle i dreulio amser mewn cymunedau tu fas i'm milltir sgwâr a chael golwg ychydig yn wahanol ar ein gwlad," esbonia.