Cyngherddau Llangollen 10
Nia Roberts sy'n cyflwyno gwledd o gerddoriaeth gan Nigel Kennedy, Bond, Only Men Aloud, Llŷr Williams, Karl Jenkins a Band y Cory.
Eisteddfod Ryngwladol Gerddorol Llangollen
Mae criw cynhyrchu a chyflwynwyr rhaglenni S4C o Eisteddfod Ryngwladol Gerddorol Llangollen eleni yn edrych ymlaen yn fawr at fod yng nghanol yr hwyl a'r dillad lliwgar ar faes yr Eisteddfod.
Colled drist
Ond yng nghanol y bwrlwm, bydd pawb yn cofio'n annwyl am Robin Jones, a fu farw llynedd. Roedd e wrth ei fodd yn cyflwyno ar lwyfan yr Eisteddfod, ac roedd y gynulleidfa yn y Pafiliwn Rhyngwladol wrth eu bodd gydag ef.
Meddai Hefin Owen, cynhyrchydd rhaglenni S4C o'r Ŵyl, "Mi fydd hi'n deimlad od iawn bod yn yr Eisteddfod a pheidio â chlywed llais Robin. Roedd yn gartrefol iawn ar lwyfan yr Eisteddfod a doedd neb yn adnabod ei gynulleidfa yn well nag ef. Byddwn ni'n talu teyrnged arbennig iddo ar nos Fercher yr Eisteddfod."
Tîm cyflwyno S4C yn yr Eisteddfod eleni fydd Nia Roberts, Trystan Ellis-Morris, Alwyn Humphreys a Mari Grug. Alwyn a Mari fydd yn ein tywys trwy ddigwyddiadau'r dydd, gyda Nia a Trystan yn cyflwyno'r rhaglenni uchafbwyntiau gyda'r nos.
Cyflwynydd newydd - ac ymwelydd newydd
Dyma'r tro cyntaf i Trystan gyflwyno o faes Eisteddfod Llangollen, yn wir dyma fydd y tro cyntaf erioed iddo ymweld â'r Eisteddfod, ac mae'n edrych ymlaen yn fawr at y profiad newydd hwn.
"Yr hyn dwi'n edrych ymlaen ato fwya' ydy cyfarfod pobl o bob cwr o'r byd," meddai Trystan. "Ond dwi'n poeni ychydig bach am safon fy Ffrangeg, gan 'mod i heb ei siarad llawer ers i mi adael yr ysgol.
Côr y Byd
Yn ogystal â rhaglenni'r wythnos o'r Eisteddfod, bydd S4C yn darlledu cystadleuaeth Côr y Byd yr ŵyl yn fyw nos Sadwrn nesaf, ac uchafbwyntiau'r Cyngerdd Gala yng nghwmni Katherine Jenkins a'r tenor ifanc o Ffrainc, Amaury Vassili ar y nos Sul.