Boed gwynt, glaw neu hindda, bydd dros 550 o redwyr yn ymgynnull ar waelod mynydd mwyaf Cymru ar gyfer her i gyrraedd yr uchelfannau yn Ras yr Wyddfa. Beth bynnag yw'r tywydd, does dim rhaid i'r gwylwyr symud un cam o'r soffa gan fydd camerâu S4C yn dilyn y cyfan.

A fydd unrhyw un yn medru herio record amser Ras yr Wyddfa, sydd o hyd yn cael ei dal gan y rhedwr adnabyddus Kenny Stuart? Yn 1985, gorffennodd Stuart y ras mewn 62'29" ac mae'n dychwelyd eleni i ddechrau'r gystadleuaeth. Ond gyda Phencampwr Rhedwyr Mynydd y Gymanwlad 2009, Wilson Chemweno o Kenya, yn cymryd rhan yn ei Ras yr Wyddfa gyntaf, mae'r record yn y fantol.

Tîm cyflwyno Ras yr Wyddfa ar S4C yw Gareth Roberts, Dot Davies ar gopa'r Wyddfa a John Hardy yn sylwebu ar y ras yn ei chyfanrwydd.

"Mae'r ras wedi tyfu ar hyd y blynyddoedd i un o rasys mynydd mwyaf Ewrop a bob blwyddyn mae pobl y dref yn troi allan i gefnogi'r holl redwyr a'i wneud yn gymaint o achlysur," meddai John. "Croesi bysedd gawn ni dywydd sych. Mae'n werth gweld yr olygfa hyd yn oed os nad yw'r rhedwyr yn ei werthfawrogi ar y pryd."

Mae John wedi cael tipyn o brofiad yn rhedeg eleni wrth iddo gymryd rhan ym marathon Llundain. Ond dyw'r marathon yna ddim wedi ei sbarduno i gymryd rhan mewn ras fel Ras yr Wyddfa.

"Dim gobaith caneri -; dwi'n ddigon hapus gyda fy nhraed ar y ddaear y tro ma. Dwi 'di gael fy nghreisis canol oed yn rhedeg y marathon eleni ac mae'r pengliniau dal i frifo!"