Pam benderfynais di enwebu dy deulu i fod yn fwy iach ar gyfer y rhaglen?
Roeddwn i a Lloyd yn eithaf ffit cyn dechrau Cwm Sal Cwm Iach, ond wnaethom ni enwebu'r teulu er mwyn ceisio annog mam i wneud mwy. Fel teulu, rydym i gyd yn aelodau o'r gampfa leol ac yn mwynhau nofio a chwarae sboncen. Mae Lloyd hefyd ar lyfrau'r Gweilch ac yn chwarae rygbi drwy'r amser.
Beth yw'r peth anoddaf am fod yn fwy iach?
Bwyta'n iach! Rydym ni gyd yn hoffi lot o fwydydd sy'n llawn braster felly roedd yn anodd iawn torri lawr i fod yn onest.
Beth yw'r peth gorau am fod yn fwy iach?
I ddilyn ffordd well o fyw ac i deimlo'n dda am eich hun.
Pwy allan o dy deulu sydd wedi cael yr anhawster fwyaf wrth geisio mynd yn fwy iach?
Lloyd. Cyn dechrau, doedd diet Lloyd ddim yn dda o gwbl. Mae ganddo ddant melys ac mae'n hoffi bwyta bwydydd llawn braster felly cafodd e amser caled iawn ar y cyfan. Ei broblem yw bod e ddim yn hoffi bwyta pasta neu salad - mae'n hoffi sglodion a phethau sydd ddim yn dda ichi!
Pa sialens oedd gorau gennych chi i wneud?
Rwy'n credu mai cerdded i fyny Pen-y-fan oedd gorau gen i. Wnes i fwynhau bod allan yn yr awyr iach a chael bod ymysg ffrindiau. Sialens gorau Lloyd oedd cael sesiwn hyfforddi gyda rai o sêr rygbi Cymru - Dwayne Peel ac Andrew Bishop. Wnaeth e fwynhau'n fawr ond roedd yn waith caled iddo.
Pa sialens oedd anoddaf?
Dwi ddim yn hoff iawn o nodwyddau ac ati, felly roedd y sialens gyntaf lle bu'n rhaid inni fonitro ein hiechyd (drwy gymryd pwysau gwaed ayyb) yn anodd iawn ifi. Rwy'n cofio teimlo'n sâl yn meddwl am y peth.
Pa gyngor fydde ti'n rhoi i deulu a oedd eisiau dilyn eich esiampl chi?
Cefnogwch eich gilydd achos dyw e ddim yn rhwydd a dilynwch ddiet cytbwys.
Sut mae'r broses wedi effeithio arnoch chi fel teulu?
Erbyn hyn rydym yn gwneud mwy o bethau fel teulu - rydym yn bwyta gyda'n gilydd yn fwy, yn mynd i'r gampfa neu i nofio gyda'n gilydd, ac rwy'n helpu Lloyd chwarae rygbi yn yr ardd pan fod angen ymarfer arno.
Os rhywbeth fyddech chi'n newid am eich amser ar y gyfres?
Rwy'n credu bydde' ni wedi gallu rhoi bach mwy o ymdrech mewn i'r sialensiau ar adegau.
