Alwyn: Dydw i ddim angen mwy o grysau a dwi'n trio deud hynny wrtha i fy hun ond wedyn os ydych chi'n gweld rhywbeth dach chi isho ac yn licio, pam lai?

Nia: Oes yna un dilledyn sydd yn teyrnasu yn y cwpwrdd dillad felly?

Alwyn: Wel, ma’ crysau yn sicr yn bwysig iawn iawn i mi. Dwi’n cofio y siop 'ma’n dod i Fangor – Horesh oedd ei henw hi – ac odd hi’n hollol wahanol. A dwi’n cofio edrych, pan o’n i’n ryw 14mlwydd oed, ar y crysau Ben Sherman 'ma yn y siop a dyna pryd dwi’n cofio gweld yr enw Ben Sherman am y tro cyntaf. Mi oedd yna grys yn Horesh, crys 'turquoise’ gyda phigau yn y goler ac o’n i’n meddwl y baswn i wrth fy modd yn cael y crys yna, ond doeddwn i ddim yn gallu’i fforddio ar y pryd, nes un diwrnod o’n i’n medru mynd i’r siop a phrynu’r crys yna a hwnnw oedd y 'thrill’ cyntaf i mi. Ac ers hynny, ma’ yna ryw hud anferthol yn perthyn i grysau a theis.

Alwyn: Dwi yn sylweddoli ei fod o’n rhyw fath o afiechyd, yr obsesiwn yma efo crysau, dwi’n cyfadde hynny a dwi’n credu fod hynny’n bwysig i rywun wneud. Mi ddechreuis i gael gwared o rai ond mi oedd yn ormod o boen. Roedd fy nghalon i’n gwaedu dros orfod cael gwared a rhai. Felly mi oedd genai ddewis wedyn, unai bod fel 'alcoholic’ sy’n prynu boteli y byddwn yn prynu crysau a’u cuddio nhw mewn llefydd yn y ty, tu ôl i’r wardrob neu dan y gwely a bod fy mhroblem ,neu fy salwch, i’n mynd yn waeth neu 'mod i’n bod yn onest a dweud wrtha i fy hun allai’m gwneud hyn, a dyna wnes i. Dwi’n gorfod smwddio bob hyn a hyn ond mewn gwirionedd alla i fynd am ryw hanner blwyddyn heb orfod smwddio yr un crys os ydw i jyst yn mynd at y casgliad.

Alwyn: Mae gan y crys Versace denim yma, fanylyn neis ar y coleri a’r pocedi.

Alwyn: Be dwi’n hoffi am grysau Tommy Hilfiger ydi’r manylion rownd y goler. Dwi’n licio hynny, ydi o’n neud i chi boeni amdana i?

Nia: Ydw, dwi yn poeni dipyn bach ond dwi’n trio cuddio dach chi’n gweld!

Alwyn: Mi brynes i grys Ben Sherman yn ddiweddar a dwi heb ei wisgo eto. Edrychwch ar y manylion rownd y botymau - ond ydi hynny’n wahanol ac felly yn ddifyr iawn?

Alwyn: Ac am y tro cyntaf erioed, mi weles i ar label y crys lun yr hen Ben Sherman a dipyn o’i hanes o – 'The Mod God’ yn y 50au hwyr. Roedd yn cael ei ystyried yn 'King of Trend’ yn Carnaby Street.

Alwyn: Ma’ pawb yn dychmygu bod fy holl grysau arwain i yn hollol blaen ond fy ngwraig brynodd hwn i mi a dwi’n ymddiheuro o flaen llaw os ydi pobl yn mynd i gael dipyn bach o sioc rwan – edrychwch beth syddd ar y cefn, eliffantod cariadus dros ben! Allwch chi ddim tynnu siaced mewn cyngerdd efo pethau fel hyn ar eich cefn a chydig wyr pobl fod rhywbeth fel hyn ar eich cefn!

Alwyn: Yn yr un modd y mae'r crys du a gwyn yma hefyd. Nes i ffansio yr un yma oherwydd bod ganddo enwau rhai o'r llefydd dwi wedi bod ynddyn nhw – Sydney, New York ac yn y blaen. Unwaith erioed dwi 'di gwisgo'r crys yma achos ma'r rhan yma'n stiff ofnadwy a phan o'n i'n arwain mi oedd yr holl beth yn mynd fyny gyda mi, doedd yna ddim hyblygrwydd ynddo o gwbl felly ma'n ddigon posib mai unwaith erioed y bydd y crys yma wedi cael ei wisgo mewn cyngerdd.

Alwyn: Dwi’n cofio pan nes i wisgo 'tails’ am y tro cyntaf a rhai o wragedd aelodau’r côr yn cwyno 'dan ni ddim yn gweld eich pen-ôl chi mwyach’ a doeddwn i erioed wedi sylweddoli pa mor bwysig oedd hi i ferched mewn cynulleidfa i weld pen-ôl yr arweinydd. Mae’n debyg bod y pen-ôl yn fwy o 'attraction’ nag ydi lot o bethau eraill, felly mi nes i stopio gwisgo 'tails’ am gyfnod i fodloni’r gwragedd yma - gwragedd gyda llaw, nid merched ifanc yn anffodus.

Alwyn: Ma’r seremoni o agor crys newydd yn rhoi cymaint o bleser i mi – tynnu’r pinnau yn enwedig. Dwi wrth fy modd efo’r teimlad o grys newydd a’r oglau, mae’n fendigedig tydi. Fydd o byth run peth eto, ma’ hwn yn cychwyn ar ei yrfa heddiw, hwn ydi ei ddiwrnod cyntaf o weddill ei fywyd a phwy a wyr lle mae o’n mynd i fynd yn y diwedd. Ond mae o’n rhoi pleser mawr, mawr i mi agor crys a’i wisgo am y tro cyntaf.

Nia: Fedrwch chi grisialu sut dach chi’n teimlo am eich dillad chi?

Alwyn: Pan dwi’n gwisgo crys newydd am y tro cyntaf, yna mae’n gwneud i mi deimlo’n dda, mae’n gwneud i mi deimlo’n fwy hyderus. Dwi yn berson eitha swil. Ma’ 'na lot o bobl methu deall hyn, dwi’n gorfod ymladd oddi mewn i mi fy hun i fod yn gymdeithasol ac i fod yn hyderus ynglyn â chyfarfod pobl. Ond, ma’ dillad yn help achos o leia wedyn y bydd pobl falle yn dod fyny at rywun a deud 'o, dwi’n licio’ch tei chi, lle gafoch chi honna?’ math o beth neu 'o le gawsoch chi’r crys yno?’. A ma’ 'na deimlad da i gael o wisgo dillad sydd yn neis, sydd yn ffitio a dach chi’n teimlo’n gyfforddus ynddyn nhw. Mae o’n rhoi hyder i chi pan nad ydych chi mewn gwirionedd yn berson hyderus.