Nia: Ma’ gen ti fwy nag un cwpwrdd dillad does Angharad?

Angharad: Ma’ gyda fi gwpwrdd dillad gyda sawl dror yn yr ystafell wely, cwpwrdd dillad yn ystafell wely Tanwen ac Efa yna cwpwrdd dillad yn yr ystafell sbâr, wedyn ma’ 'da fi gwpwrdd dillad o dan y gwely yn yr ail stafell sbâr. Hefyd, ma’ 'da fi’r atig.

Nia: Sut ma’ dy steil di wedi newid dros y blynyddoedd?

Angharad: Wel, dwi ddim yn meddwl 'mod i wedi cael rhyw fath o steil arbennig. Ma’n steil personol i’n gwbl ddibynnol ar be ydi fy ngwaith ar y pryd.

Nia: Pam ti’n meddwl bo’ ti 'di dewis cadw popeth?

Angharad: Achos y rheswm 'camgymeriad' yna. Ma’ pawb yn meddwl bo’ dillad yn mynd i ddod nôl i ffasiwn ond rhan fwyaf o’r amser dyw’r dillad ddim. Dwi hefyd yn arbennig o hoff ohonynt felly falle bo’ hynny’n reswm hefyd, 'mod i’n ffeindio hi’n anodd tu hwnt i daflu dillad bant neu eu rhoi nhw bant fel y dylwn i ei wneud yn fwy aml, oherwydd 'mod i’n teimlo bod rhan ohona i’n mynd hefyd os ydw i’n eu taflu nhw ffwrdd.

Angharad: Dyma’r siacedi newyddion. Ma’ rhai ohonyn nhw mor amlwg o’u cyfnod, yn arbennig y ddwy yma o 'Mondi'. Roeddwn yn arfer gwisgo lot o 'Mondi'. Maent yn nodweddiadol o'r gyfrnod o ran y botymau 'brass', sy'n edrych yn eitha’ milwrol.

Nia: Oeddet ti’n mynd i Lundain felly i brynu’r dillad?

Angharad: Na, odd 'Howells' yng Nghaerdydd yn gwerthu 'Mondi' a siop fach ar Wellfield Road yng Nghaerdydd hefyd ond roedden nhw llawer iawn rhatach yn siop Wellfield Road nag odden nhw fod i dwi’n credu.

Angharad: Dwi’n cofio prynu hon ar gyfer gwasanaeth carolau y BBC sydd eto yr un math o steil milwrol.

Nia: Sydd yn ôl mewn ffasiwn rwan ond falle ddim cweit y steil yma chwaith!

Angharad: Ma rhai o’r siacedi yma yn ddrud iawn, fi oedd yn talu amdanyn nhw oherwydd doedd yna’r fath beth ar gael yn y BBC ar y pryd beth bynnag. Dwi’n edrych arnyn nhw nawr a meddwl 'waw'.

Angharad: Ma’ hon yn siaced neis brynes i o Escada yn y sêl oherwydd dwi ddim yn credu y byddwn wedi gallu ei fforddio hi heblaw hynny. Ma’ hi’n dal i deimlo’n hyfryd ond ma’ hi’n edrych mor fawr er bod fy maint i heb newid. Ma’ fel petai lot o faint ynddi, ma’ nhw’n hir.

Angharad: Ma’ fe’n anodd credu 'mod i wedi gwisgo rhain i gyd ar un adeg.

Nia: Ti’n enw ac yn wyneb cyfarwydd iawn. Wyt ti’n teimlo pwysau i edrych yn dda hyd yn oed os wyt ti jyst yn pigo allan i’r siop?

Angharad: Na, ddim o gwbl, erioed wedi gwneud. Dwi erioed wedi teimlo felly a fydda i ddim yn gwisgo llawer o golur chwaith os nad ydw i’n y stiwdio chwaith. Wy’n cofio unwaith pan o’n i’n Tescos yn Llanelli a dath rhyw fenyw lan ata i a gweud "O, Angharad Mair! O! Ma’ golwg arnoch chi!" Ag o’n i yn teimlo’n ofnadwy ar y pryd ond dwi heb wir deimlo’r pwysau yna. Dwi’n meddwl 'mod i am gyfnod mor hir yn rhedeg, ag o’n i’n byw mewn tracsiwts ag o’n i’n byw mewn rhyw fath o fyd, heblaw am gyflwyno, lle nad oedd hi’n bwysig beth oeddwn i’n ei wisgo.

Nia: Yn yr atig ma’r rhain yn byw fel arfer ie Angharad?

Angharad: Ie, ond eto ma’r rhain yn rhai o’n hoff ddillad i erioed. Ma’r rhain yn enfawr. Faswn i’n eu galw yn 'ddillad steddfod’, y rhai roeddwn yn eu defnyddio i gyflwyno Eisteddfodau Cenedlaethol a Llangollen er enghraifft.

Angharad: Dyma ffrog arall oeddwn yn ei gwisgo i gyflwyno sy’n debyg i ryw fath o liain bwrdd a ryw fath o 'bib’ enfawr ar ei blaen!

Angharad: Ffrog 'Jasper Conran' yw hon ac mae hi'n enghraifft dda o sut mae dillad wedi newid oherwydd ma’ hi’n faint 8 ond ma’ hi’n edrych yn faint 16. Os y byddwn yn ei gwisgo heddiw, bydde pobl yn rhyfeddu bo’ gymaint o ddefnydd ynddi a'i bod hi’n ddilledyn Haf.

Nia: Ma’r siaced yma’n lloerig iawn iawn!

Angharad: Odd hon ddim yn un ddrud ond y tro cyntaf odd rhaid i mi ddarllen y newyddion ar ddiwrnod Nadolig, odd rhaid i mi gael rhywbeth oedd yn waw! Dyma’r un brynes i a wisges i felly ma’ hon wedi cael ei gweld yn darlledu’r newyddion ar ddydd Nadolig circa 198-rhywbeth.

Angharad: Dyma gyfnod cynnar Heno a dwi’n meddwl bod y ddelwedd wedi newid er cyfnod y newyddion oherwydd bod y dillad yn gorfod bod yn wahanol er mwyn gweld y gwahaniaeth ar sgrîn.

Angharad: Arferwn brynu siwmperi anferth ag odd 'shoulder pads’ ynddyn nhw’i gyd ar y pryd. 'Mondi' yw’r rhan fwyaf ohonyn nhw. O’n i’n prynu nhw yn 'David Evans' yn ystod fy awr ginio. Dyna odd steil Heno, yr holl siwmperi yma.

Nia: Beth am gynllunwyr a siopau? Wyt ti’n dueddol o brynu pethau drudfawr neu wyt ti’n prynu pethau rhatach hefyd?

Angharad: Ma’ 'na un siop nawr, dwi ddim yn credu allwn i wneud hebddi sef 'Karen Millen'. Dwi’n cofio dod ar draws 'Karen Millen' am y tro cyntaf yn Llundain a meddwl 'waw’, fi 'di ffeindio’r siop 'ma allwn i brynu popeth ar gyfer y teledu ac ma’n gweddu fy steil ac ma’ nhw’n ddillad sy’n fy ffito hefyd.

Angharad: Dyma’r cwpwrdd dwi’n ei ddefnyddio ar gyfer fy nillad i nawr. Dyma’r dillad gwaith. Sawl eitem o 'Karen Millen'.

Nia: Yn eu canol nhw’i gyd, Chanel!

Angharad: Ges i hon yn anrheg penblwydd pan o’n i’n ddeugain gan fy ngwr. Doeddwn i ddim eisiau parti, felly athon ni i Baris a ges i hi bryd hynny felly dwi’n credu y bydd hon yn ffefryn anferthol gen i ar hyd fy oes.

Nia: Ti’n licio dillad sy’n gwneud i ti deimlo’n eitha benywaidd?

Angharad: Ma’n rhaid 'mod i achos eu bod nhw’n ddillad sydd â lot o ffrils ac yn y blaen.

Angharad: Ma’ 'na ambell i beth drud yn y cwpwrdd fel ffrog 'Christian Lacroix' a blows 'Prada' ond fydda i mond yn eu prynu nhw os alla i eu cael nhw ar sêl, fyddwn i byth yn gallu’i prynu nhw heblaw am hynny!

Angharad: Odd y flows 'Christian Lacroix' yn fod i fod tua £450 ond ges i hi am tua £60. Ac fel mae’n digwydd ma’ hi’n edrych yn lyfli ar y sgrîn ac mae’r defnydd yn lyfli hefyd.

Nia: Ynghanol y blodau a’r holl liw, ma’ 'na siwt 'pinstripe’?

Angharad: Wel, ma’ pob rheol yn gorfod cael ei thorri ac mae hon yn un enghraifft sy’n profi bod dillad yn gallu dod nôl. Nes i brynu hi pan o’n i’n 21 oed i fynd i briodas. Fydda i’n gwisgo hi os bydd rhaid i mi fynd i ryw gyfarfod busnes yn Llundain, ac mae hi’n dal i fy ffito i’n berffaith ac mae hi’n dal i weddu i’r dim.

Nia: Felly byddet ti’n dweud bod yna ryw fath o gysylltiad emosiynol gyda dy ddillad di felly?

Angharad: Yn bendant. Dyna pam dwi’n eu cadw nhw’i gyd falle. Dwi yn dueddol o gofio ble brynes i bopeth, ble wisges i e, shwt o’n i’n teimlo ac mae’r holl fywyd yn dod yn fyw yn sgil yr holl ddillad yma. Ac yn rhyfedd ddigon, gan bo’ genai ddwy ferch fach, ma’r dillad yma yn fwy pwysig, dwi’n teimlo 'mod i’n gallu pasio rhywfaint ohona i mlaen atyn nhw. Dwi’n gobeithio’n fawr rhyw ddydd y bydden nhw yn cael pleser mawr o’u gwisgo nhw hefyd.