CWPWRDD DILLAD: Cliciwch yma i weld y lluniau'n fwy
Mae Brychan Llyr, sy'n byw yng Nghefn Cribwr, ger Pen-y-bont, yn gyflwynydd teledu, canwr, perfformiwr o fri, perchennog tîpîs, joci ond yn fwy na dim, yn gymeriad unigryw.
Brychan ar ei siwt hela...
Peth cynta' sy'n fy nharo fi wrth agor y cwpwrdd yw'r wisg hela. Cymer y gôt 'na, teimla'r pwysau sydd arni.
Mae honna'n drom dydi.
Sa'i'n mynd i ddweud faint dales i amdani hi, ond dyna'r dilledyn drutaf sydd gen i. Mae hi'n wlân felly mae hi'n gynnes, ac mae hi'n drwchus os ydy hi'n glawio - ond alli di ddychmygu'r pwyse sydd arni hi wedyn! A be sy'n neis iawn amdani fyd yw ei bod hi'n cau am dy ganol di. Felly mae hi'n dangos dy siâp di'n neis, ond mae hi'n agor allan wedyn felly mae hi hefyd yn gyfforddus pan wyt ti ar gefn ceffyl. Dwi'n meddwl bod y wasgod 'ma'n perthyn yn wreiddiol i nhad-cu i. Sai'n hollol sicr ond sa'i'n mynd i adael i hynny sbwylo stori dda!
Brychan ar siwtiau...
Bob tro wy'n gwisgo'r siwt yma, ma' pobl yn gweud wrtho i, "Ew, bachan, siwt hyfryd, lle ges di hi?" a phan dwi'n deud y gwir, Aberteifi, do's neb yn fy nghredu i! Ond mae 'na rywbeth yn braf mewn gallu gwisgo siwt fel hon i'r BAFTAs yng Nghaerdydd, yng nghanol y crachach ac arian mawr, a chael pobl yn rhoi compliments ar y siwt.
Er gwaethaf dy holl lwyddiannau, Brychan o Jess fyddi di i mi bob tro. Oes gen ti ddillad o'r cyfnod hynny?
O's, fydde i'n cadw dillad achos ma nhw'n atgofion. Nawr, ga'th hon ei chynllunio'n arbennig i fi, am ddim rheswm mond i ddangos mod i'n ddigon gwallgo' i wisgo lycra tynn coch! Ma' hwn mor dynn ti'n methu gwisgo dim pants o dan o fo, felly mae rhai agwedde o dy gorff di'n amlwg iawn!