Lle wyt ti’n meddwl fod dy gariad di tuag at gelf yn gorgyffwrdd gyda dy gariad di tuag at ddillad?

Maen nhw’n cydblethu mewn lot o ffyrdd gwahanol. Dwi’n meddwl ei fod o wedi dechrau wrth i mi wneud prosiect ar fywyd llonydd, a sbïo ar gorneli cartrefi mam a dad, a nain a taid, gan edrych sut mae pobl yn gosod pethau yn eu cartrefi a sut dwi’n gosod pethau yn fy fflat bach i. I mi’n bersonol, dillad a sgidiau a handbags oedd y rhan fwyaf o’r pethau o’n i’n edrych arnyn nhw.

Beth wnaeth i ti greu darn o waith yn uniongyrchol am esgidiau?

Ro’n i’n lwcus i gael swydd fel artist preswyl yn amgueddfeydd sir Conwy ac fe wnes i weithio cyfnod yn amgueddfa Sir Henry Jones yn Llangernyw, ac roedd tad Henry Jones yn grydd. Fe ofynnais i drigolion Llangernyw a phlant yr ysgol i ddod a chasgliad o sgidiau ata’i. Mae’n siŷr mod i wedi cael tua 60 pâr i gyd hefo’i gilydd a fe es i ati i sketchio.

Heblaw am fagiau, esgidiau ac ati, pa themâu arall sydd yn ymddangos yn dy waith di?

Dwi’n gwneud lot o waith figurative, yn edrych ar bobl mewn gwahanol leoliadau. Dwi’n licio tynnu lluniau pobl wrth iddyn nhw weithio neu ymlacio, neu thra maen nhw’n sgwrsio.

Oes yna un math o ddefnydd wyt ti’n licio gweithio gyda’n benodol?

Pob math rili. Nes i dreulio amser yn Sri Lanka ac yn India. Tra o’n i yn Sri Lanka fe dreuliais amser gyda seamstress o’r enw Sahira oedd yn gweithio gyda phob mathau o hen silk. Roedd e fel rhyw fath o insight i fywyd go iawn pobl Sri Lanka, a sut oedden nhw’n mynd ati i ennill eu pres. Roed Sahira yn pwytho ac yna’n sychu herbs, roedd hi fel rhyw entrepreneur. Dwi’n meddwl ein bod ni dyddiau yma wedi anghofio’r ffordd draddodiadol o weithio gyda pheiriant gwnïo.

Mae gen ti gymaint o fagiau mae hi’n edrych fel oriel yma!

Dwi wrth fy modd yn gosod pethau fyny ar y wal. Dwi wedi gwneud ambell i lun o’r holl fagiau yma ar y wal. Mae gen i fag bach pen ci, wel pwrs, a hwnnw oedd y pwrs cyntaf i mi ei gael, felly mae’n ddipyn o oed.

Mae hon yn edrych fel ei bod hi wedi dod o India.

Nes i brynu hon yn Delhi yn India, a dwi’n difaru peidio prynu tua phymtheg ohonyn nhw. Dwi’n meddwl mai dim ond ryw 75c oedden nhw'r un, a dwi di gwisgo cymaint arni gan ei bod hi’n cool braf i’w wisgo yn India. Ond mae o wedi dechrau rhwygo. Yn anffodus gan fod y rhan fwyaf o’r stwff yn silk mae o reit fregus. Ac er bod o wedi rhwygo dwi dal wrth fy modd yn ei wisgo.

Ac o ble ddaeth hon?

Mae hon o Sri Lanka, a Sahira ddaru wneud hon i mi, hon oedd y gynta' nath hi i mi. Mi ges i’n mesur ac mae hi’n ffitio’n berffaith. Ma’i ’di cael ei gwneud ar beiriant gwnïo hen ffasiwn gan ddefnyddio pwyth anghyffredin yr holl ffordd rownd y ffrog.

Ac mae hon yn anghyffredin hefyd.

Mae hon hefyd o Sri Lanka, a geneth ifanc, dwi’n meddwl mai ryw 18 oed oedd hi, wedi dechrau busnes yn gwneud ei ffrogia’. Roeddwn i’n lwcus i allu dewis dwy sari wahanol er mwyn gwneud y ffrog. Dwi’n licio fel ma’r lliwiau yn clasho gyda’r leinin llachar.

Mae’r bag yma’n ffantastig.

Dyma’r bag fwya’ ecsentrig sydd gen i, ond dydw i ddim yn ei ddefnyddio’n aml, achos fedrai ddim rhoi mwy na phwrs a lipgloss ynddo fo, oherwydd pob tro dwi’n rhoi wbath arall ynddo fo, mae o’n mynd yn fwy ac yn fwy ac yn fwy, mae’n strechio!

Mae gen ti lond gwlad o saris yma.

Brynais i hon yn Cambodia gan ryw ddynas oedd yn gwerthu llwyth o saris tu allan i ddeml. Ar ôl i mi weld hon roedd yn rhaid i mi ei phrynu hi.

Dwi’n rili licio’r syniad yma bo’ ni’n cadw darnau o ddillad am flynyddoedd, a’n bod ni’n gwisgo dillad dro ar ôl tro, a bod stori i bob dilledyn. Dwi hefyd yn licio ailgylchu drwy fynd i siopau elusen. Dwi jyst yn meddwl fod dillad yn lot gwell pan mae yna hanes neu stori tu ôl iddo fo.