Nia: Sut y llwyddoch chi i gael y swydd o fod yn gynorthwywraig i'r Dywysoges Margaret?

Gwen: Cael llythyr yn fy ngwahodd am gyfweliad gyda'r Dywysoges Margaret. Fel oedd hi'n digwydd bod, o'n i'n mynd i Lundain am y diwrnod beth bynnag. Yn ystod y cyfweliad, dyma nhw'n gofyn be fyddwn i'n ei wneud yn Llundain ar ben fy hun y noson honno? "Wel, fel ma' hi'n digwydd bod, dwi'n cael cinio gyda Prince Charles" meddwn a dyma nhw'n gofyn lle oedd Prince Charles yn mynd i'm cyfarfod, a dyma fi'n meddwl mai nid fy lle i oedd datgelu hynny. Dwi'n meddwl bod y 'discreetness' yna wedi helpu. A dyma'r union ffrog nes i ei gwisgo ar gyfer y cyfweliad a'r cinio gyda Charles yn yr Hilton.

Nia: Dach chi'n meddwl bod eich cyfnod chi yn y palas wedi dylanwadu ar eich steil chi?

Gwen: Yn sicr. O'n i 'di gweld bywyd nag oeddwn i erioed wedi'i weld o'r blaen.

Nia: Dach chi'n aml yn rhoi enwau ar eich ffrogiau chi dydach?

Gwen: Enw'r ffrog las ydi Ffrog Diana gan i mi ei gwisgo i'w chyfarfod hi mewn cinio yng Nghaerdydd yn 1980.

Gwen: Dyma ffrog Harlech a wisgais ar gyfer angladd yr Arglwydd Harlech yn Abaty Westminster yn 1985.

Gwen: Y ffefryn yw ffrog Frank. Gwisgais y ffrog Jean Muir yma ar fy niwrnod cyntaf yn y Palas. Roeddwn i'n reit nerfus ond roeddwn i wrth fy modd gyda'm ffrog newydd. Roedd Frank Sinatra yno a dywedodd o "I like your dress". Roeddwn i wedi cynhyrfu'n lân am hynny - roedd yn ddyn neis iawn.

Nia: Beth fasech chi'n ei ddweud ydi'ch steil chi?

Gwen: Dillad sy' ddim dros y top yn ormodol. Dillad da. Tydi'r dillad heb ddyddio gymaint a hynny, dim ond y dillad blodeuog falle - er, ma' rheini'n dod nôl rwan. Dwi wrth fy modd efo blodau, lilis ydi'r ffefryn.

Nia: Newch chi byth daflu dilledyn ar gadair?

Gwen: O, byth! Mi faswn i'n meddwl bo' rhywbeth yn bod efo mi os faswn i'n gwneud hynny.

Nia: A dyma'r ffrog y gwisgoch chi i gwrdd â Lady Thatcher?

Gwen: Ffrog un lawes gyda deiamwntau ar y blaen ydi hon. Mae hi dal yn y plastig y dôth hi nôl ynddo ar ôl cael ei gwisgo. Glanhawyr y teulu brenhinol oeddan nhw. Y tro dwetha' i mi ei gwisgo hi oedd pan fues i'n Llundain i'r opera. Ma' hon yn esgus i wisgo deiamwntau. Pan o'n i'n mynd allan i'r palas odd y camerâu ym mhobman gyda'r ffrog hon.

Nia: Oedd yna bwysau arnoch chi i wisgo'n smart?

Gwen: O'n i ddim i fod i wisgo'n fwy smart na beth fyddwn i'n ei wneud yn arferol. Mi faswn i'n cael cyngor weithiau fel "Well, I wouldn't wear that if I were you. No, she won't like it", felly mi fyddwn i'n mynd i newid wedyn a gwisgo i lawr.

Nia: Mae gennych chi lwyth o hetiau?

Gwen: Ma' cael het yn gorffen gwisg a ma' cael het ddramatig yn werth y byd. Nes i wisgo het goch un tro i fynd i Abaty Westminster a mi oedd pawb yn fy nghanlyn i gyda'r het goch yma. Ond, yn siomedig iawn nath pawb sylwi bod Dame Shirley Porter yn gwisgo'r un het, felly nath pawb ddechrau ei chanlyn hi yn lle fy nghanlyn i! Ond tydi hynny ddim yn ddrwg mewn gwirionedd i gael yr un het a Dame Shirley Porter ond mi faswn i 'di licio cael ei harian hi!

Nia: O le ydach chi'n cael eich dillad chi felly?

Gwen: Dwi'm yn meddwl y dylech chi rannu'r gyfrinach yna gyda neb. Dwi'n meddwl bo' hynny'n beth pwysig. Tydach chi ddim yn dweud dwi 'di prynu yn y siop yma ac yn y siop arall, ma' hynny'n gyfrinach. Ella base rhywun yn mynd a phrynu yr un peth felly ma' hynny'n gyfrinach mawr a fydda i byth yn dweud wrth neb lle fydda i'n mynd i siopa.

Gwen ar ddillad...
Dwi'n meddwl bod eich cymeriad chi yn eich dillad chi a falle bod dillad yn rhoi cymeriad i chi hefyd.