Gwen ar ei steil personol...

Dwi wastad wedi bod yn un sy'n licio edrych yn drwsiadus, fy ngwallt i'n iawn a di gwneud fy ngholur a wna i ddim mynd allan o'r ty nes dwi di gofalu fod popeth yn matchio a dwi'n teimlo'n barod i fynd. Dwi ddim yn ffan o siopau stryd fawr o gwbl. Dwi'n licio pethau gwahanol. Dwi'n mynd rownd siopau hen bethau lot. Dwi'n dueddol o wario fy mhenwythnos yn siopa ar E-Bay, a dwi wrth fy modd. Dwi'n gallu codi am 9 o'r gloch a siopa tan 9 yn y nos.

Beth ydy'r fargen orau i ti gael erioed?

Pâr o fwts oeddwn i wedi weld yn siop Ravel am £70. Ges i nhw am £10. Be dwi'n neud efo unrhyw beth dwi ddim yn ei ddefnyddio ydy gwerthu nhw mewn car boot sale neu ocsiwn, felly dwi'n gwneud yn ôl be dwi di brynu yn barod felly does dim gwastraff.

Mae'r cotiau yma'n edrych yn debyg i gotiau reidio – ond hefo'r staes ar y cefn.

Dwi yn hoffi lês – lês a corsets, mae nhw mor feminine. Dwi'n licio pethau merchetaidd, mae na rhywbeth feminine iawn mewn lês a dwi'n ffan mawr o corsets.

Gwen ar siopau…

Dwi'n hoff iawn o fynd i un siop arbennig yn Llwydlo. Mae'r ddynes sy'n berchen y siop yn cael ei holl ddillad o Milan felly dim ond un o bopeth mae hi'n gael. Felly dwi wrth fy modd yn mynd yna achos mae o'n boutique really feminine a da chi'n cael eich trin fel brenhines tra da chi yno.

Gwen ar wisgo i fyny…

Yn y dydd ella i fynd i gwaith ac ati dwi'n gwisgo sgert a top neu drowsus neu siwt ond y dileit i fi ydy'r dillad fin nos. Buaswn wrth fy modd fel rhyw millionaire's wife achos dwi'n mwynhau dillad min nos a'r pethau glitzy a'r bags a'r accessories 'ma i gyd. Dwi'r math o berson unwaith dwi'n penderfynu gwneud rhywbeth dwi'n ei wneud o. Tua 3 blynedd yn ôl des i benderfyniad mod i'n mynd i newid fy hun a nes i golli llawer o bwysau, rhyw 4 stôn i gyd.

Gwen ar gynllunio…

Dwi'n cynllunio'n ofalus iawn be dwi'n wisgo am yr wythnos a dwi'n gwneud hynny'r noson gynt. Dyna ydy nos Sul i fi, tynnu popeth dwi'n mynd i wisgo am yr wythnos allan o'r cwpwrdd, eu smwddio nhw a hongian nhw i gyd i fyny – dydd Llun, dydd Mawrth, dydd Mercher ac yn y blaen. Mae popeth yn ei le ac mae popeth yn matchio a dyna'r math o berson ydw i, dwi'n hoffi trefn ar bopeth yn fy mywyd.