Ydych chi'ch dau yn cofio beth oedd y llall yn wisgo pan wnaethoch chi gyfarfod?

Ian. Pan nes i gyfarfod Elinor gyntaf roedd ganddi hi ychydig o bethau oedd yn ôl-fyfyriol, neu ôl-fyfyrwraigol, Post-student, pethe 'ych-a-fi', trowsus tie-dye! Elinor. Mae'n siŵr bo' Ian yn gwisgo rhywbeth tebyg! Yr ail waith wnaethon ni gwrdd - oedd Ian yn gwisgo crys siec melyn achos oedd e'n mynd i sioe Llandysul ac oedd e moyn edrych fel ffarmwr!!!!

Ian ar ddillad.

Mae mherthynas i gyda dillad yn eithaf dosbarth gweithiol - mae rhaid iddyn nhw fod yn ymarferol, mae'n rhaid iddyn nhw bara. Roedd fy mam wastad yn dweud, y dywediad, "Buy cheap, buy twice".Hefyd mi oedd hi'n dweud, "You can always tell a man by his shoes". Mae sgidie yn bwysig iawn i mi a dwi ond yn prynu esgidiau o un catalog, Shipton and Hennage.

Ian ar ei steil.

Dwi'n hoffi pethe traddodiadol. Basa rhai pobol yn dweud hen bethe, pethe allai ddibynnu arnyn nhw, dwi'n gwybod nad ydyn nhw yn mynd i fynd mas o ffasiwn, ma' nhw'n mynd i fod yr un fath nawr a fydda nhw mewn ugain mlynedd ac y bu nhw ugain mlynedd yn gynt. Dwi'n eithaf ceidwadol felly hefo'n nillad. Mae dillad yn ryw fath o fasg. Rydym ni'n gwisgo dillad er mwyn cuddio o'r byd, neu er mwyn dangos ein hunain i'r byd. Dwi'n gwisgo'n dillad er mwyn cuddio. Ma' nhw yn gneud i mi deimlo bod pethau ddim yn newid mewn byd sydd yn newid yn barhaol.

Dillad yw'r un peth fedri ddibynnu arno?

Ie. Er enghraifft ma' gen i wyth neu naw crys sy'n gwmws run fath. Mae gen i chwech pár o cords run lliw. Mae'n siŵr fod pobl yn meddwl mod i'n gwisgo fy nhrowser yn hir, ond, dwi yn newid, ma' nillad i gyd yn lán, ond bod gen i nifer o wahanol barau.

Oeddet ti'n arfer gwisgo'r Lederhosen yma yn hogyn bach?

Doeddwn i ddim yn fascist bach na dim, nac yn Nazi supporter! Roedd fy modryb yn byw yn Düsseldorf, yn yr Almaen ar y pryd ac roedd hi'n eu danfon nhw adre i mi. Roeddwn i'n ddiolchgar iawn o'i hanrhegion hi achos ma' nhw yn bethe arbennig, ma' nhw yn para am oes. Ges i fwy o stick gan y plant bach eraill am fod yn un o'r Welshies yn hytrach na bod yn fascist Cwm Rhondda!

Beth yw hanes y gardigan yma?

Mae gen i gardigan sydd yn felyn ac mae hi wedi bod gen i ers sbel hir. Ma' 'na batches arni, tyllau ynddi ac mae hi di shrincio yn y golch oherwydd mod i wedi ei rhoi hi mewn ar dymheredd rhy uchel ar un adeg. Ges i hi'n wreiddiol o Oxfam, mae hi gen i achos ei bod hi'n fy atgoffa fi yn gyfan gwbl o gardigan yn nhad.

Beth wyt ti'n feddwl am ffasiwn?

Mae'n gas gen i ffasiwn á chas perffaith mae'n rhaid mi gyfadde'. Dwi ddim yn deall y wraig, er enghraifft, dwi ddim yn deall ei syniad hi o brynu rhywbeth ond i'w dwlu ar ddiwedd y tymor neu ar ôl ryw fis neu ddau ar ôl ei wisgo unwaith. Tydw i ddim yn gweld dillad fel peth disposable, ffwrdd-a-hi, ma' nhw fatha ail groen i mi. Felly dwi'n eu cadw am flynyddoedd maith, maen nhw yn mynd yn fwy, fwy cyffyrddus.

Os ydy Ian yn dweud i fod o yn gwisgo er mwyn cuddio rhag y byd, wyt ti'n gwisgo i wynebu'r byd?

Elinor. Yndw weithiau i raddau. Mae pobl ifanc yn eu harddegau o Japan yn gwisgo dillad crazy, hollol wallgo', hetiau Mikey Mouse a rhyw sanau pen-glin, dwi ddim yn mynd i'r eithaf hynny ond fydda i'n gwisgo falla breichled fach lachar neu sgarff, rhywbeth bach. Yn aml iawn, dim rhywbeth bach i dynnu sylw pobl eraill ata i, ond rhywbeth i wneud i mi wenu. Y freichled yma, rwy'n dwli arni. Hanner can ceiniog, dyna hanner can ceiniog o hapusrwydd sydd o amgylch fy ngarddwrn i ar hyn o bryd. Mi fyddai'n neud o i blesio fi.

Pob tro ti'n sôn am ddillad ti'n gwenu fel giát.

Dwi'n meddwl bod dillad yn hwyl! Dwi hefyd, achos mod i yn gwneud darlleniadau barddoniaeth yn credu fod delwedd yn rhan bwysig, dwi'n credu nad jyst geiriau dwi'n gyflwyno, ond hefyd dwi'n cyflwyno fy hun. Rwyt ti' hefyd yn cyflwyno profiad.

Beth yw hanes y siwt yma?

Siwt wnaeth Ian brynu i mi o Iwerddon. Ma' siŵr fod y lliw tweed yma yn apelio at Ian, ond y peth oedd e'n gwybod y byddwn ni'n hoffi oedd y gynffon bysgota yn y cefn. Sgert eithaf plaen, gyda pleats yn y cefn. Ma' hi'n edrych fel taswn i yn barod i fynd ati i riding with the hounds yn y siwt yma! Ma' hi'n braf. Dwi'n meddwl fod y gynffon yn dangos mod i ddim yn cymryd y peth ormod o ddifri, gobeithio beth bynnag.

Beth yw hanes y ffrog fach liwgar yma?

Wel tunic yw'r peth coch, melyn a nefi ar y top. Roeddwn i'n gwisgo honna pan o ni ryw bedair blwydd oed, mam oedd wedi ei gwneud hi, ond, fe wnaeth hi fersiwn fwy iddi hi hefyd. Yn y 70au, dwi'n meddwl y cafon ni taste by-pass fel cenedl. Ond, fe oedd yna mother and daughter smocs, a smoc yw e. Ych a fi! Ond, o ni yn gwisgo hwnna yn aml iawn gyda'r boots coch yma. Os oeddet ti'n holi am le ges i'n hoffter o liwia - dyma ddangos i ti.

Beth yw steil Casper?

Mae Casper yn od achos ma' ganddo fo ddillad reit dda - lot ohonyn nhw wedi etifeddu gan ffrindiau sy' moyn ailgylchu dillad trwy eu rhoi nhw i bobl eraill. Mae o wrth ei fodd yn gwisgo pethau erchyll megis crysau-t Spider-man a thracwisg ych-a-fi. Gan fod ei ffrindiau i gyd yn gwisgo pethau felly mae e moyn y pethau ni wir ddim moyn iddo fo wisgo. Mae ei synnwyr o beth sydd yn cŵl a beth sydd ddim yn ddatblygedig iawn. Yn bedair oed, roedd e'n gwybod yn union beth oedd e'n hoffi a beth oedd e ddim yn hoffi. Mae e'n gofyn i wisgo ei hoff ddillad lawr ar y dillad isaf - fe roith o restr i mi. Mae e wedi creu ei hunaniaeth weledol yn lled gynnar, ond, ddim yn wahanol i unrhyw blentyn arall yr oes yma.