Joyce: Allai'm cofio adeg lle o'n i ddim yn gwirioni gyda dillad a defnyddiau. I gael dillad dwi eisiau, rhaid i mi eu gwneud nhw gyda llaw. Dwi siâp od ond dwi'n hoffi dillad sy'n ffitio felly os dwi'n prynu rhywbeth, mae'n rhaid i mi ei altro fo, felly mae'n haws ei wneud o'r cychwyn.

Nia: Dyma ydi eich ystafell creu chi ie? Sut ydach chi'n mynd ati i greu dilledyn felly?

Joyce: Ia, dyma'r stafell llanast! Allwch chi ddim bod yn dwt a chreu! Dwi'n rhoi lluniau o ddillad sy'n apelio fyny ar y wal ar un ochr i'r ystafell, hongian gwahanol ddefnyddiau ar ochr arall a'n rhoi sgetsys fyny o flaen y peiriant gwnio. Ar ôl gwneud sgets neu ddau, fydda i'n creu patrwm. Os torrwch chi'n iawn, ewch chi ddim yn anghywir. Allwch chi byth ddad-wneud y torriad, felly mae'n werth gwario lot o amser ar hynna. Dyna ydach chi'n ei dalu am, y toriad hynny yw, pan fyddwch yn prynu o siopau drud. Dwi'n gwybod fy maint a'm siâp i'r fodfedd erbyn hyn a felly'n gwybod sut i guddio bob pechod hefyd!

Joyce: Fydda i fel arfer yn ychwanegu rhyw fath o addurniad ar y dillad fydda i'n eu creu - unai brodwaith neu rhyw fath o fwcl neu falle tamaid o ledr, ond brodwaith fwy neu lai bob amser.

Nia: Pa fath o ddillad dach chi'n licio?

Joyce: Dillad clasurol. Dwi'n hoffi steil Armani. Tydw i ddim yn hoffi ffrils, dwi ddim yn hogan 'girly' o gwbl. Dyma'r dilledyn agosaf gai at Armani gan fy mod wedi defnyddio ffabrig Armani i'w wneud.

Nia: Lle gafoch chi'r defnydd yma felly?

Joyce: Defnydd nad ydi o'n berffaith ydi o gyda ryw nam bach arno, felly mi oedd ddipyn yn rhatach. Ac mae gen i siwt drowsus wedi'i wneud o'r un defnydd hefyd. Dwi wedi pwytho 'top stitching' arno hefyd.

Nia: Ydach chi wedi gweld y defnydd yma mewn dillad Armani a wedi copio'r steil?

Joyce: Do. Er, mae yna dipyn bach mwy o fanylder ar fy fersiwn i. Mi fues i mewn arddangosfa Armani yn Llundain a mi oedd yna drowsus oedd yn debyg iawn. Twîd sidan gyda lliain ydi'r defnydd. Mae'n fendigedig ac yn gwisgo'n braf.

Nia: Dach chi'n ffeindio eich bod chi'n mynd ar ôl y defnyddiau drud neu rhad?

Joyce: Drud. Dwi'm yn mynd i roi gwaith ar rywbeth sy' ddim yn mynd i edrych yn dda ar y diwedd. Dwi'm yn meindio talu felly am ddefnydd da.

Nia: Faint mae hi'n gymryd i chi wneud dilledyn?

Joyce: Does yna ddim lining yn y siwt yma, felly mae'n syml iawn. Fase hi ddim yn cymryd yn hir iawn i wneud gwisg tebyg - diwrnod neu ddau falle.

Joyce: Dwi'n edrych ar gylchgronau am ysbrydoliaeth. Nai brynu 'Vogue' gan ei fod tua blwyddyn o flaen beth sy'n mynd i fod yn y siopau. Yn aml iawn, mae genai ddillad sy' ddim cweit 'di cyrraedd y siopau o flaen llaw sy'n gallu edrych yn rhyfedd ond erbyn y flwyddyn wedyn, mae pawb yn gwisgo steil tebyg. Ma' hon yn un oedd o flaen ei hamser. Nes i hon dair mlynedd yn ôl allan o ffabrig gwlân meddal.

Nia: Oes yna bobl yn dod fyny atoch a'n dweud 'dwi'n licio eich dillad chi, o le gafoch chi nhw?'

Joyce: Oes, mae 'na a dwi'n gwrido.

Nia: Pam felly?

Joyce: Oherwydd tydi rhywun ddim yn licio dweud 'fi sydd wedi gwneud hwn' fel petae. Dwi'n cael fy mhlesio wrth gwrs ond falle bod yna ryw swildod hefyd wyrach.