Julian ar ddillad...

Os ti'n newid dy ddillad trwy'r amser, dwi'n siŵr bod gen ti ddim cymaint o wreiddiau, felly dwi'n tueddu trio cael ambell i beth dwi'n gadw hyd yn oed os dwi byth yn i wisgo fo.

A chditha yn hogyn o Sir Fôn Julian, pryd nes di ddechrau bod hefo'r diddordeb yma mewn delwedd a steil ac ati?

Pan o ni tua un ar bymtheg, yn y TEC ym Mangor, sylweddolais i fod 'na fwy i fwyd 'na cyt-powlan a parka. Dyma fi'n cael catalogs drwy'r post, Kays catalog a Freeman's dwi'n siŵr, wedyn mynd trwy'r catalogs yma am ryw ddillad trendi iawn. Miami Vice oedd popeth ar y pryd dwi'n cofio. Dyma fi'n gordro ryw 'slip-ons' tanjarin a phetha, ryw gardis gwyn a lemon, lliwia' erchyll a deud y gwir. Wedyn mi ordrish i nhw, oherwydd mod i dan ddeunaw toeddwn i ddim yn cael i prynu nhw a dweud y gwir, felly yn gordro nhw dan enw mam a gwneud yn siŵr bod mam allan, wedyn mi oedd y parseli yn cyrraedd. Dyna oedd y dechreuad, yn TEC ym Mangor yn '84 ma' siŵr.

Ma' dy grysau di i gyd yn rhai hefo patrymau a lot o flodau hefyd.

Mae hon yn un retro. Gefais i hon yn Llundain pan oedden ni yn gneud 'The Caretaker', drama Harold Pinter, ar y pryd, yn Greenwich. Mae cwpwl o'r crysa' newydd yma wedi eu prynnu ar ôl ffilmio. Wrth lwc, un o 'perks of the job' fel actor, os oes gen ti wisg neis, neu wisg ti'n licio ar ôl ffilmio, ti'n gallu prynu fo'n discownt.

Ti'n licio pysgota hefyd dwyt? Oes 'na ffasiwn mewn pysgota môr?

Mae o'n rhywbeth dwi'n neud ers dwi'n dair ar ddeg. Mae o yn rhywbeth sydd o ddiddordeb lle ti'n gorfod gwisgo rhywbeth ymarferol iawn. Fedri di ddim gwisgo dy designer label i fynd i bysgota môr. Ffasiwn? Efallai ambell un, dwi ddim yn gwbod. Dydw i byth yn meddwl mod i yn ffasiynol pan dwi'n mynd allan i bysgota achos dal pysgod di'r peth pwysica' dwi isho neud.

Be mae dy gasgliad di o ddillad yn golygu i chdi?

Ambell i eitem ma' siŵr yn golygu mwy na'r llall. Ond ar y cyfan, ymarferol ydyn nhw, yn enwedig ers i mi gael plant, rhaid mi beidio bod yn rhy precious am unrhyw beth.