O Indonesia y daw Juliet Revell yn wreiddiol. Ond, mae hi wedi byw yn Sir Benfro ers rhai blynyddoedd bellach. Dillad Gorllewinol y mae Juliet yn wisgo o ddydd i ddydd ond mae ganddi amryw o ffrogiau steil Tseiniaidd y gynllunwraig Suzi Wong yn ogystal â chasgliad helaeth o sarongs o bob math yn ei chwpwrdd dillad...
Juliet: Wy mewn cariad â Chymru. Cwrddais â'm gwr, Gareth, yn Indonesia. Priodom yn Indonesia a daethom i fyw yma.
Nia: Pan oeddech chi'n tyfu fyny yn Indonesia, oes gennych chi lawer o atgofion o ddillad a defnyddiau? Dach chi'n cofio mynd i siopa amdanynt?
Juliet: Oes, mae llawer o atgofion hapus 'da fi o fod gyda fy Mamgu, gyda Mam a phawb. Mae'n hyfryd. Dwi'n cofio mynd i siopa gyda nhw yn y marchnadoedd i brynu sarongs.
Nia: Pa fath o ddillad ydach chi'n hoffi?
Juliet: Ar gyfer achlysur draddodiadol, sarong Kebaya neu efallai ddilledyn Tseiniaidd, ffrog gan Suzy Wong falle. Mae rhain yn sarongs a batik Java. Mae gen i rai batik o Bali hefyd sy'n fwy lliwgar ond mae'r rhai Java yn rai lliw brown a gwyn.
Nia: Oes yna sarongs yma sydd hefo rhywbeth personol, emosiynol ynghlwm wrthyn nhw?
Juliet: Oes, mae hwn yn sarong oedd yn perthyn i Mamgu y gwisgodd i briodi. Dydw i ddim yn gwisgo hon dim ond ei chadw i gofio.
Juliet: Mae hon yn un sy'n cael ei galw yn sarong 'bore a phrynhawn' oherwydd yn y bore fyddech chi'n gwisgo yr ochr lliwgar a gwisgo'r ochr dywyllach, ychydig fwy tawel yn y nos.
Nia: Ydych chi'n hiraethu am Indonesia?
Juliet: Arferwn hiraethu ond dwi ddim yn hiraethu erbyn nawr oherwydd fy mod yn hapus yn byw yma yng Nghymru.
Juliet ar ddillad...
Mae dillad yn bwysig i mi yn enwedig y wisg draddodiadol er mwyn dangos fy mod yn dod o Indonesia.
- Bob nos Fercher 20:25