Mefys: Mae'r 80au yn bwysig i mi achos yn ystod cyfnod uwchradd ma'rhywun yn cael ei hunaniaeth eu hunain, ma'rhywun yn magu stamp o ran ffasiwn eu hunain felly yn ystod y cyfnod yma yn hytrach na bod Mam yn dewis fy nillad, roeddwn i'n dechrau dewis fy nillad fy hun.

Nia: Lle fysat ti'n deud bod y diddordeb yma mewn dillad wedi cychwyn?

Mefys: Mae'n debyg yn ystod fy mhlentyndod, yn unig blentyn a'n unig ferch, cael fy nghertio o gwmpas gan Mam o siop i siop achos odd Mam yn hoff iawn o ddillad hefyd. Ac anrhegion dolig fel y ddol 'Sindy'a chael dillad ychwanegol i newid y ddol. Hefyd, grwp o ferched yn ifanc, mi oedd rhywun yn bownsio oddi ar ei gilydd o ran be oedd yn mynd mlaen efo'r ffasiwn ac hefyd oedd rhywun yn ceisio efelychu pwy bynnag oedden nhw'n ei weld ar y teledu neu artistiaid pop ac yn y blaen. 'Duran Duran'oedd fy hoff fand ac o ran merch faswn i'n deud Madonna ac mi oedd hi'n newid ei ffasiwn yn aml iawn a dyna oedd yr 80au.

Nia: Ti'n sôn am yr 80au - sut oedd y dillad yn cysylltu efo dy brofiadau di yn y cyfnod yna?

Mefys: Y siwtiau diwedd yr 80au mae'n debyg pan o'n i'n y chweched dosbarth ac yn y coleg. Roeddwn i'n gwisgo'r siwtiau yma bob penwythnos ac mae'n siwr bod pobl yn meddwl pam bod hon yn gwisgo siwt i fynd allan er enghraifft. Odd y dillad yma yn ddrud, faswn i'm yn gwario gymaint ar ddillad i fynd allan heddiw er mod i'n dal yn hoff o ddillad. Ond, o'n i'n teimlo 'mod i'n gweithio ac felly'n annibynnol ac felly'n haeddu y math yna o 'perk'ar y pryd pan falle oedd pobl eraill yn gwario ar bethau eraill, ond yn ystod y cyfnod yna, dillad oedd y flaenoriaeth. I feddwl 'mod i wedi byw drwy'r 70au, 80au a'r 90au a'r presennol y ddegawd fyddwn i'n ddewis fyddai'r 80au.

Mefys: Dwi'n cofio mynd i Sioe Môn yn 14mlwydd oed gyda Nain a Taid a gweld siaced a mynd adra a digwydd meddwl sut faswn i'n gallu perswadio fy rhieni i brynu'r siaced i mi. Mi oedd hi'n eitha drud ar y pryd ond mi oedd genai esgus bod fy modryb i'n priodi o fewn y mis wedyn a dyma fi'n deud y base hi'n edrych yn berffaith ar gyfer y briodas yna! A wedyn digwydd bod mi oedden nhw'n reit garedig a phrynu'r siaced i mi.

Mefys: Mi oedd siorts eitha 'baggy'at y penglin yn reit nodweddiadol o'r cyfnod yma ond doedd y siorts ddim yn ddigon ac mi oedd rhaid prynu'r crys a'r trwsus. Dyma'r rhai wisgais i ar gyfer fy mharti yn ddeunaw oed ar ddiwedd yr 80au.

Mefys: O'n i'n hoff iawn o'r lliwiau, mae'r trwsus yn hynod o 'baggy'ac mae'r siaced yn eitha 'fitted'.

Mefys: Dyma 'culottes'eitha eithafol. Fase rhywun yn tybio mai sgert ydyn nhw tan i rywun ddechrau cerdded. Be dan ni'n sylwi fan hyn ydi bod y wast yn dod fyny yn uchel iawn. Be sy'n eironig ydi 'mod i 'di prynu 'culottes'ryw fis yn ôl ac mae'n dangos sut mae ffasiwn yn troi a phethau'n dod nôl.

Nia: Mae'n fy rhyfeddu i bo'ti wedi cadw'r holl ddillad yma, pam?

Mefys: Mae'n fy rhyfeddu i hefyd! Dwi'm wir yn gwybod. Mae o jyst yn ddegawd lle ma''na gymaint o brofiadau, cymaint o atgofion. Ma'jyst yn ddegawd sy'n bwysig i mi a'r cyfnod yna o'n i'n tyfu fyny - dyna pryd o'n i'n y chweched, yn coleg, yn dechrau gweithio a dyna'r cyfnod y mae rhywun wastad yn edrych yn ôl ac yn cofio yr holl atgofion felly mae'r dillad wedi fy nilyn mewn bocs o dy fy rhieni i fan yma ac mi faswn i'n torri fy nghalon pe bai'r bocs yn diflannu a dweud y gwir.