Megan: Odd Mam a diddordeb mewn gwnio. Doedd hi heb gael addysg oherwydd ei bod hi adre ar y fferm yn gweithio ond wrthi bob amser efo fi efo gwaith llaw efo gwau neu wnio ac mi fydda hi'n altro rhywbeth i mi, gwneud rhywbeth allan o hen eitem falle. Felly mi oedd yn creu diddordeb yna i wedyn. Wedyn pan o'n i'n un ar bymtheg, ac am adael yr ysgol, penderfynu y byswn i'n mynd mlaen efo gwnio ac i brentisho i gael gwybod yn iawn sut oedd gwneud dillad amser hynny.

Nia: Dach chi'n cofio beth oedd y dilledyn cyntaf i chi ei wneud?

Megan: Dwi'n cofio mai sgertan fach oedd y peth cyntaf. Odd hi'n syml iawn ond o'n i'n meddwl y byd ohoni de. Odd hi fel aur doedd, o'n i di gwneud hi fy hun. Wedyn mynd mlaen ryw stejan fach wedyn a gneud rhyw flows bach de fel bod isho gwneud rhyw lawes fach a choler a wedyn ffrog.

Nia: Mae Megan bellach yn dipyn o feistres ar ei chrefft. Ma hi 'di ennill cystadlaethau a gwobrau lu am ei gwaith ac yn cael ei chyfri yn un o'r goreuon ym Mhrydain yn ei maes.

Megan: Dyma i chi ddillad dwi'n gadw yn y cwpwrdd dillad. Dwi rioed wedi eu gwisgo nhw, ond ma'genai feddwl y byd ohonyn nhw achos dyma'r dillad dwi 'di bod yn gystadlu efo nhw.

Megan: Pan dach chi'n gwneud gwaith cystadleuol, mae'r safon yn 'sbot-on'i fod. A dach chi'n neud mwy o ymdrech i wneud gorffeniad gyda bob pwyth yn ei le ac felly ma'genai dipyn o feddwl o'r dillad dwi wedi eu defnyddio i gystadlu.

Nia: Mae ansawdd uchel gwaith Megan yn golygu ei bod hi'n cael lot o waith yn gwneud ffrogiau priodas. Mae yna ddwy ffrog briodas arbennig yn ei chwpwrdd dillad.

Megan: Ffrogiau priodas fy ngenod i fy hun ydi'r rhain. Un Manon yr hynaf ydi hon, dwi'n mynd nôl 15 mlynedd rwan. Mae'r ysgwyddau yn eitha 'padded'fel roedden nhw. Dim ysgwyddau o gwbl ar ffrogiau heddiw. Penwisg hefyd wedi cael ei gwneud ond tiaras sydd erbyn heddiw. 'Loops'a botymau yn ryw stamp ar fy ngwaith i dwi'n credu, dwi'n ofnadwy am eu gwneud nhw ac yn licio eu gwneud ar ffrogiau priodas, bob un yn agor.

Megan: Ffrog Sioned, fy merch arall ydi hon sy'n hollol wahanol eto, 5 mlynedd yn ddiweddarach. Ma'hon yn wahanol, ma'hi fel ei bod wedi ei theilwra. Ma''na gefn diddorol i'r siaced oedd i fynd efo'r ffrog oedd yn disgyn i ddarnau pletiog.

Nia: Dach chi'n gneud lot o ddillad i chi eich hun?

Megan: Faswn i ddim yn breuddwydio mynd allan i brynu dilledyn. Fyddai'n gneud bob dim. Dwi'n fyr hefyd felly ma'n rhaid i mi fod yn hynod o ofalus. Ma'rhai lliwiau yn fy nhorri yn fy hanner ac mae'n rhaid i ddillad fy ffitio yn enwedig trowsusau. Dwi'm yn gwybod lle y byddwn yn ffeindio trowsus fyddai'n fy ffitio'n berffaith, felly ma'hi'n lot haws a rhatach i mi brynu medr o ddefnydd tydi i neud trowsus.

Nia: Newch chi gadw darn o ddefnydd am hir heb neud dim byd ag ef felly?

Megan: O, gwnaf. Ma'gen i gist yn y cefn yn llawn o ddefnyddiau. Weithiau pan fydda i angen rhywbeth yn sydyn, fydda i'n mynd i'r gist, dewis defnydd a neud rhywbeth.

Nia: Dwi wrth fy modd efo'r got lledr frown sy'ganddoch.

Megan: Mi nes i hi ddechrau'r wythdegau, un o'r cotiau cyntaf nes i, nes i fwynhau ei gwneud hi a'i gwisgo hi. Ma'hi'n dal i fod yn feddal ond ma'hi 'di bod yn y cwpwrdd am flynyddoedd

Nia: Os byth dach chi isho'i gwared hi, dach chi'n gwybod lle i ddod.

Megan: Dillad dwi'n eu gwisgo ydi rhain. Fel dach chi'n gweld dwi'n berson siwtiau. Dwi'n hoff iawn iawn o hon, ma'hi'n cashmere, ma'hi'n feddal ac yn braf i'w gwisgo. Ma'r trowsus yn llwyd plaen ac wedyn nes i ddefnyddio gweddill defnydd y siaced i addurno'r ochrau. Ma'nhw'n bootleg.

Megan: Ma'fy nghot swêd ddu yn ffefryn gen i, ma'hi'n handi iawn. Dwi'n medru ei gwisgo hi fyny gyda du neu frown ac mae hi'n gynnes ac yn gneud i bob achlysur.

Megan: Dwi yn mwynhau gweithio gyda defnydd glaw a dwi'n medru ei gael yn hawdd, dwi'n gyrru ffwrdd amdano a gewch chi bob lliw ohono, mae'n fendigedig gweithio ag ef.

Megan: Nes i hon gôt law yn unswydd i fynd ar wyliau i Batagonia. Ma'hi'n ysgafn, ma'hi wedi ei leinio gyda 'fleece'a'r llawes wedi'i leinio gyda 'satin'felly mi oedd hi'n hwylus dros ben.

Nia: Dach chi'm 'di meddwl ehangu'n fusnes lle fasech chi jyst yn neud cotiau neu 'fleeces'felly?!

Megan: Dim o gwbl, dwi jyst yn mwynhau neud un felna, dwi'm yn mwynhau neud lot o'r un peth.

Megan: Dwi'n licio gweld dillad. Dwi'n licio gweld pobl yn eu gwisgo nhw ac yn enwedig os ydyn nhw'n edrych yn dda ynddyn nhw. Ma'n mynd a fy llygaid i ac mi gofia i am y steil falle a fyddai'n meddwl am y steil pan fydda i'n mynd ati i wneud rhywbeth.

Nia: Felly dach chi'n rhyw ddwyn syniadau o bobman dach chi'n mynd?

Megan: O! Dwi'n beryg bywyd am ddwyn syniadau! Peryg bywyd, felly os oes rhywun gyda dilledyn neis, gwyliwch