CWPWRDD DILLAD: Cliciwch yma i weld y lluniau'n fwy
Mae Nia Roberts yn un o actorion amlycaf Cymru. Mae hi wedi ennill bri ar lwyfan ac ar deledu, gyda rhannau yn Fondue, Rhyw a Deinosors, Score a Border Café, ac mae hi hefyd wedi hawlio sylw ar y sgrin fawr gyda ffilmiau megis Solomon a Gaenor a Lois. Ar hyn o bryd, mae hi’n paratoi ar gyfer ei rhan yn addasiad Daniel Evans o ddrama Saunders Lewis, Esther.
Fyddi di’n breuddwydio am ddillad weithiau?
Byddaf weithiau, ond ’wy’n credu mod i’n synfyfrio am ddillad yn fwy. Os oes rhyw achlysur mae’n rhaid i fi wisgo rhywbeth ’wy’n synfyfrio am be ’wy ishe prynu neu rhywbeth sydd gen i yn barod sut fedrai wisgo fe’n wahanol neu os fydde gen i ddigon o bres beth fyddwn i’n prynu.
Dwi’n credu pryd oeddwn i’n fach roedd cwpwrdd gwisgo fyny ’da ni yn yr ystafell wely a lot o hen ddillad mam yna o’r pumdegau, ac roedd mam yn pigo pethe lan i ni o wahanol lefydd, felly roedden ni jyst yn mwynhau gwisgo lan yn y ty trwy'r amser, dwi’n meddwl dyna lle ddechreuodd e.
Beth ydi dy syniad di o wisgo fyny rwan te, be ydi dy steil di?
Be dwi'n hoffi wneud yw cymysgu'r hen 'da'r newydd. Dwi’n hoffi prynu pethau vintage achos mae rhyw hanes yn berchen iddyn nhw sy’n gwneud nhw’n fwy arbennig i mi, jyst meddwl am y bywyd mae’r dillad yma wedi cael, mae hynny yn fy fascinatio fi.
Nia ar y ffrog goch...
Mi wnes i enill BAFTA un flwyddyn am Lois yn 2000, a ’nes i wisgo hon. Yn wreiddiol doedd dim sgert oddi tanddo fe, ond nath mam ffeindio’r hen sgert yma o’r pumdegau.
Nia ar yr Oscars...
Yn 2000 hefyd gafodd Solomon a Gaenor ei nomineiddio am Oscar, a ’nes i wisgo’r ffrog yma
i’r seremoni. ’Wy’n caru’r ffrog yma, un gan Jenny Packam. Roedd yr holl brofiad o’r Oscars yn anhygoel, roedd steilydd gyda fi a ges i ddewis o lot o ffrogiau, ond hon nes i ddewis yn y diwedd. Roeddwn i’n caru’r ffrog ac wedyn wrth gwrs roedd y tlysau, oedd yn dod o Asprey & Garrard ac o’dd yn werth oddeutu £40,000. A ’nath Mr Asprey roi benthyg bag Judith Lieber werth oddeutu £3,000 i mi, ond ar fore'r Oscars ’nes i ddeffro a gweld y bag a meddwl, ’mae'r bag yn horrible, fi wir ddim yn hoffi’r bag ’na’. Felly ’nes i ffonio Mr Asprey i ddweud wrtho a doedd o ffili credu’r peth!