Nia: O’r holl gypyrddau dillad dwi wedi eu gweld, dwi’n meddwl mai dyma ydi’r un mwya anarferol ohonyn nhw gyd. Sut ges di’r syniad i storio pethau fel hyn?

Nicola: Pan odd genai gwpwrdd dillad arferol, odd bob dim wedi’u stwffio fewn i’r cwpwrdd a doeddwn i ddim yn gallu ffeindio dim byd. Ma’n haws fel hyn.

Nia: Ma’ popeth yn edrych run peth o fan hyn gyda’r holl liwiau gyda’i gilydd.

Nicola: Dwi di arfer efo bob dim, dwi’n gwbod be sgenai. Dwi hefyd wedi arfer gyda’r gwahanol 'textures’ felly dwi’n gwybod yn union be sgenai a lle i’w ffeindio… heblaw am ddu…ma’ du yn anodd i’w ffeindio!

Nicola: Pan o’n i’n fach, o’n i’n dipyn o 'tomboy’ rili a do’n i ddim rili fewn i ffasiwn. Pan oedd fy ffrindiau gyd yn cyfuno bob dim, doeddwn i ddim. O’n i’n gorfod gwisgo iwnifform yn ysgol odd mor gyfyng o ran beth oeddwn eisiau’i wisgo mewn gwirionedd. Do’n i ddim isho bod yr un peth a phawb arall. Dwi’n licio sefyll allan a bod yn unigryw.

Nia: Sut faset ti’n disgrifio dy steil personol di?

Nicola: Dwi byth yn gwisgo rwbath sy’ run peth un diwrnod ar ôl llall. Weithiau na i wisgo rhywbeth merchetaidd, weithiau nai wisgo rwbath 'grungy’, ma jyst yn dibynnu sut dwi’n teimlo neu sut mae’r tywydd ond lliw 'di’r peth perthnasol yn bob dim dwi’n wisgo.

Nia: Be ti’n neud, wyt ti’n jyst dewis un lliw neu gymysgedd o liwiau?

Nicola: Weithiau nai wisgo un lliw ond dwi’n meddwl bo’ cymysgu lliwiau yn reit neis hefyd – lliwiau na fasen nhw’n mynd gyda’i gilydd yn draddodiadol.

Nia: Ti’n gwbod be sy’n fy synnu i ydi ma’ gen ti bedwar pâr o fwts sy’ union run peth ond eu bod nhw’n wahanol liwiau a run fath efo’r trainers?!

Nicola: Os dwi’n ffeindio rwbath dwi’n licio ac ma’n gyffyrddus dwi’n ei brynu ym mhob lliw fedrai wedyn oherwydd mae mor hawdd. Dwi’n gwbod sut ma’ nhw’n teimlo a sut ma’ nhw’n edrych felly ma’n hawdd jyst i addasu nhw efo gwahanol liwiau.

Nicola: Dwi’n prynu lot o bethau o siopau elusen hefyd. Dwi’n licio’r scarff yma, mae’n sidan a dim ond punt oedd a dwi’n gwisgo hwn fatha top.

Nia: Ti’m yn poeni ei fod yn mynd i syrthio lawr?!

Nicola: Na, dwi’n meddwl mod i 'di pasio hynny erbyn hyn achos dwi’n neud o drwy’r amser a dwi ddim yn poeni dim mwy!

Nicola: Jîns Evisu o siop elusen oedd rhain. Rhai newydd sbon am £3.50, oddan nhw’n £100 yn wreiddiol a nes i eu torri i siorts. Dwi’n neud hynny’n aml achos os dach chi’n neud 'mess’, diom ots achos eu bod nhw mor rhad.

Nicola: Ma’r ffrog werdd o Wlad yr Iâ. Fues i draw yno i astudio gwaith celf fy uncl a mi es i siopio yno run pryd. Odd 'na lot o bethau neis yna. Mae eu defnyddiau nhw’n hollol wahanol i fan hyn, roedd y 'textures’ yn hollol wahanol i’n dillad ni fan hyn.

Nicola: Ges i’r top yma o Wlad yr Iâ hefyd. Ma’ na rywbeth reit hen ffasiwn yn y defnydd. Os dach chi’n gwasgu’r defnydd mae’n crinclo ac yn aros felly – felly does dim rhaid ei smwddio!

Nicola: Ma’n ffrindiau i jyst yn meddwl 'mod i’n nyts rili. Dan ni’n mynd allan am ddiod weithia a dwi’n hollol 'over the top’ rili weithia a dwi’n gwbod fy hun weithia ond fedrai’m jyst bod yn gyffredin o ran fy nillad.

Nicola: O’n i’n mynd i barti gwisg ffansi nos galan a nes i brynu 'catsuit’ arian ac mae’n afiach. Odd o’n edrych yn iawn ar y we ond pan ges i o, odd o’n rhy hwyr i ffeindio rwbath arall!

Nia: Ti’m yn gwisgo hwn i’r dafarn yn Nefyn felly?!

Nicola: Nadw! Dwi 'di trio ond ma’ pobl jyst yn stopio fi!

Nia: Be sy'n mynd i ddigwydd nesa? Wyt ti'n gweld dy hun yn creu rhyw fywoliaeth o ddillad a ffasiwn?

Nicola: Dwi’n mynd i neud cwrs sylfaen ym Mangor flwyddyn nesa mewn celf ac wedyn ar ôl hynny dwisho mynd i neud ffasiwn yn Llundain. Dwi isho neud dylunio, felly bysedd 'di croesi os weithia i’n ddigon caled!

Nia: A be’ fydd yn dy gasgliad di?

Nicola: Bob dim rili. Fel dach chi’n gweld, ma’ genai gymaint o betha gwahanol – pethau patrymog, pethau plaen a dwi jyst yn gobeithio gallu cario mlaen i gasglu pethau fel sydd yn fy nghwpwrdd dillad a chael syniadau newydd o bob man rili. Dwi’n meddwl os fasech chi’n dod nôl mewn blynyddoedd, fasa bob dim di newid, dwi byth yn cadw pethau yr un peth.