Sut y cafoch chi'r enw ‘Treflyn Trowsus Tynn’?

Dyna oedd y ffasiwn yr adeg honno. Tynn yn y top a llac ofnadwy ar y gwaelod. O’n i’n gwisgo jîns tynn ar y dechrau ac wrth ganu gigs dyma rhai pobl yn y ngalw fi’n ‘Treflyn Trowsus Tynn’. Doedd yna neb arall yn gwisgo rhai mor dynn a fi!

Wnaethoch chi benderfyniad pwrpasol mai dyna fydda’ eich steil chi?

Doeddwn i ddim yn gwybod ar y pryd fod merched yn edrych ar ddynion yn y ffordd yna, o’n i’n meddwl mai mond y ffordd arall oedd o! Pan o’n i ar y llwyfan yn perfformio doeddwn i ddim yn deallt fod hanner meddwl y merched ar yr hogyn a’r hanner arall ar y gerddoriaeth. Doeddwn i ddim yn ganwr pop ac felly heb arfer gyda ffasiwn beth. Doedd y ddelwedd ddim mor bwysig i mi a’r alaw a’r gitâr wrth gwrs. Ges i gynnig mynd i Fanceinion a’i gwneud hi yn y ‘big time’, ond hogyn bach o’r wlad o’n i a doeddwn i ddim isho mynd i’r ddinas fawr. Felly mi roish i gorau iddi am gyfnod nes ddaeth y sîn Gymraeg, ro’n i wedyn yn mynd i gyngherddau a nosweithiau llawen.

Oeddet ti’n hoffi ffasiwn lloerig y 1970au?

Oeddwn. Roeddwn i’n mynd i Fangor i siop o’r enw Cream Zone oedd yn gwerthu lot o ddillad anhygoel.

Pam eich bod wedi newid eich delwedd?

Roeddwn i yn perfformio mewn ‘cabaret’ yng Nghaersws, a nes i groesi’r llawr at fwrdd hefo tri gŵr yn yfed champagne. Roedd gan un ohonyn nhw wallt cyrliog, a medda fo, “Gordon Hills, Tom Jones’s manager”. Wedi ngwylio i a gwrando arna’ i’n perfformio, dyma fo’n awgrymu y dylwn i gael delwedd am mod i’n rhy blaen ac yn edrych yn rhy gyffredin. Wedyn mi awgrymodd i mi wisgo catsuit.

Sut oedd hogyn o Borthmadog yn dod o hyd i wisgoedd o’r fath?

Roeddwn i’n mynd o Fangor i Euston ar y trên fel ‘away day’. Wedi cyrraedd y ddinas fawr a mynd i Soho mewn tacsi, mi ddoish i ar draws siop o’r enw Colin Wilde. Es i mewn ac roedd ‘na ddyn hefo gwallt hir fel Buffalo Bill, a barf hir ganddo. Roedd lluniau o Cliff Richards a Shirley Bassey, a phawb oedd yn enwog ar y pryd ar y waliau ym mhob man.

Ar y pryd ro’n i’n mynd i lefydd fel Aberffraw i ganu ac roedd y lle’n orlawn. Roedd gair wedi mynd ar led fod dyn o Borthmadog yn gwisgo dillad rhyfadd fel catsuits, ac fe ddaeth pawb i weld os oedd y stori’n wir!

Hon oedd y siwt gyntaf i chi ei brynu?

Roedd y trowsus yma’n fflêrs mawr, mawr, a doeddwn i byth yn meddwl y bydda’ fflêrs yn dod yn ôl i ffasiwn. Un peth dwi yn ddifaru wneud ydy tapio’r trowsus i lawr a chael gwared â’r fflêr ar gyfer yr 1980au, achos doedd fflêrs ddim yn ffasiynol yn yr 80au. Ond hon oedd y wisg gyntaf i mi brynu gan Colin Wilde yn Llundain.

Mae’r siwt ddu ac aur yma’n ffantastig.

Nes i orfod mynd lawr i Lundain i weld hon gan mod i’n methu deall y disgrifiad dros y ffôn. Roedd o’n mynnu dweud y gair brocade a doedd gen i ddim syniad beth oedd ffasiwn beth!

Mae yna goler fawr iawn ar hon, beth ydy hanes y siwt wen yma?

Ges i hon yn 1977 pan fu farw Elvis - er cof am Elvis. Roedd y trowsus yma yn llydan hefyd gyda aur lawr y tu blaen i gyd a’n enw fi ar y cefn - TJ - Treflyn Jones. Dwi’n hoff iawn o wyn, a hyd heddiw dwi’n dal i wisgo lot o wyn.

Mae’r siwt yma’n un llachar iawn ac yn gwneud i chi sefyll allan!

Dyna oedd y syniad. Ro’n i eisiau un siwt oedd yn llachar ac fe feddyliais i, pam ddim mynd am binc!