Cafodd y Rhyfel Byd Cyntaf effaith enfawr ar gymdeithas ac ar agwedd pobl tuag at ffasiwn. Yn sydyn, nid oedd yn dderbyniol i wisgo gormod o emwaith neu ddillad moethus, a gwelwyd tueddiad tuag at silwét mwy syml a sobr. Gan fod defnydd yn brin, cododd godreon sgerti ac wrth gwrs roedd steil milwrol i'w weld ym mhobman. Wedi'r Rhyfel, parhaodd y ffasiwn o ddillad mwy syml ond roedd yr 1920au yn gyfnod mwy arbrofol, gyda chelf art deco a'r symudiad avant garde yn dylanwadu ar ffasiwn ac agwedd llai rhwystredig tuag at wisgo. Yn araf roedd yr agwedd tuag at ferched yn newid, ac er na chafodd pob merch yr hawl i bleidleisio hyd nes 1928, roedd eu cyfraniad yn ystod y Rhyfel wedi cael ei gydnabod, ac wedi gwneud llawer i ryddhau merched o ffasiynau trwm a swmpus y gorffennol.
Er mae gwisg y 'flapper' yw'r wisg yr ydym yn ei gysylltu â'r 1920au, ni ddaeth y ffasiwn yma drwodd yn wirioneddol tan y 1920au hwyr. Roedd 'flapper' ffasiynol yn gwisgo'i gwallt yn sgleiniog ac yn fyr, yn gwisgo colur ac yn smocio a naill ai'n gwisgo ffrog syml neu siwtiau dynion. Er mai rhywbeth i'r cefnog oedd ffasiwn wedi bod hyd yma, roedd patrwm llai cymhleth y ffrog yn haws i ferched cyffredin ei gopïo, felly daeth y steil yma'n boblogaidd iawn ymysg pobl gyffredin yn ogystal â'r dosbarth uchaf.
- Bob nos Fercher 20:25