Cafwyd amrywiaeth o ddelweddau ffasiwn yn ystod y 1980au.
Tuag at ddiwedd y 1970au, roedd cerddoriaeth, unwaith eto, wedi dylanwadu ffasiwn gyda bandiau fel y 'Sex Pistols' yn gwisgo dillad gan y dylunydd pync chwyldroadol Vivienne Westwood, sydd erbyn hyn yn un o ddylunwyr mwyaf adnabyddus Prydain yn y byd. Daeth Llundain yn enwog am ei steil pync a'n enwedig ei steil gwallt 'mohican'. Cymerodd y dylunydd Prydeinig Zandra Rodes elfennau o'r steil pync yma a newidiodd y ddelwedd rywfaint yn ei chasgliadau i'w wneud yn fwy derbyniol. Defnyddiodd binnau dwbl (safety pins) a chadwyni aur i addurno ei dillad, a thorrwyd tyllau'n bwrpasol gan adael gwagleodd gyda'r croen yn dangos yn ei ffrogiau.
Delwedd ffasiwn arall yn y 1980au oedd y 'New Romantics', a welodd adfywiad y blowsus Edwardaidd, peisiau a chamisolau. Daeth y ddelwedd yma'n hynod boblogaidd yn dilyn ffurfio toreth o fandiau fel 'Adam and the Ants', 'Spandau Ballet' a 'Duran Duran'.
Datblygodd y ddelwedd yma i sidanau a les, 'jumpsuits', siwmperi mohair a blowsus â choleri les. Parhaodd y dylanwad o bync cynnar yr wythdegau at ganol yr wythdegau, gyda dylunwyr fel Gianni Versace ac Azzedine Alaïa yn defnyddio pinnau dwbl (safety pins), botymau pres a lycra tyn yn eu dyluniadau.
Yn dilyn steil pync ymosodol yr wythdegau, fe ddaeth y padiau ysgwyddau a lliwiau cysefin y 'power dressing'. Amlygwyd y steil yma gan raglenni fel Dynasty a Dallas, a chan y siwtiau siarp oedd y Dywysoges Diana a Margaret Thatcher yn eu gwisgo.