Blaenau Gwent, 6 Hydref
TRAFODAETH FYWIOG A GONEST NOSON GWYLWYR S4C
Tro gwylwyr S4C oedd hi i fynegi barn am raglenni a gwasanaethau'r Sianel mewn Noson Gwylwyr arbennig ym Mlaenau Gwent - gyda dros 80 o bobl yn rhan o'r gynulleidfa.
Cafwyd trafodaeth fywiog ac onest rhwng y gynulleidfa a phanel o swyddogion S4C yn Neuadd y Glowyr, Llanheledd, gyda'r sgyrsio yn amrywio o wasanaethau i Ddysgwyr, pryder am ddyfodol y Sianel, rhaglenni sy'n apelio at bobl ifanc, gwell ddefnydd o'r we a'r cyfryngau newydd a gwerthfawrogiad o wasanaeth meithrin Cyw.
Y darlledwr Jason Mohammed oedd yn cadeirio'r drafodaeth ac roedd y panel yn cynnwys Huw Jones (Cadeirydd Awdurdod S4C), Arwel Ellis Owen (Prif Weithredwr S4C), Geraint Rowlands (Cyfarwyddwr Comisiynu S4C), Siân Eirian (Pennaeth Gwasanaethau Plant) a Glenda Jones (Aelod o Awdurdod S4C).
Aelodau o gorau Only Boys Aloud Cwmbrân a Glyn Ebwy wnaeth ddarparu adloniant y noson, dan arweiniad y Cyfarwyddwr Cerddorol Tim Rhys-Evans.
Meddai Garffild Lloyd Lewis, Cyfarwyddwr Cyfathrebu S4C, "Rydym wedi cael croeso cynnes iawn yma ym Mlaenau Gwent yn ystod digwyddiadau Calon Cenedl S4C. Pwrpas ein nosweithiau Gwylwyr yw i wrando ar farn ein gwylwyr ac fe gawsom ni lawer o sylwadau defnyddiol am ein rhaglenni a'n gwasanaethau, yn gwynion ac yn ganmoliaeth. Roedd yn braf hefyd cael cwmni gymaint o ddysgwyr, pobl ifanc a phobl ddi-gymraeg yn y noson ac yn sicr roedd hynny'n adlewyrchu bod S4C yn bwysig ym mywydau pobl o bob cefndir ac ardal. Roedd gwerthfawrogiad y gynulleidfa o'r sianel yn amlwg ac yn galondid mawr i ni."
Cynhaliwyd y Noson Gwylwyr fel rhan o ymgyrch Calon Cenedl S4C yn Ne Ddwyrain Cymru.
Mae cwis dafarn hwyliog yng Nghlwb Rygbi Glyn Ebwy, sesiynau barddoniaeth gydag Eurig Salisbury (Bardd Plant Cymru) mewn amryw o ysgolion yn yr ardal a noson yng nghwmni cast Pobol y Cwm eisoes wedi cael ymateb positif.
