Rhiannon Wyn Parry, rated this book:
Dyma un arall o addasiadau Elin Meek i’r Gymraeg – o waith Malachy Doyle y tro hwn. Mae lluniau Petra Brown yn draddodiadol, ond eto’n ddeniadol tu hwnt. Rwy’n sicr y byddant yn ennyn diddordeb amryw o blant i ddarllen y llyfr annwyl hwn ynghylch barcutiaid coch yng Nghymru. Yn wir, mae’r lluniau mor fanwl fel y gallai plentyn ddilyn y stori’n weddol rwydd drwy gyfrwng y llun yn unig. Credaf y gellid defnyddio’r llyfr hwn gydol adran iau yr ysgol gynradd. Byddai’r plant ieuengaf wrth eu bodd yn gwrando ar y stori hyfryd am sut y ceir barcutiaid coch yng Nghymru hyd heddiw. Darlunnir perthynas Lowri a’i mam-gu yn hudolus o gelfydd drwy gyfrwng ymwneud y fam-gu â’i hamgylchfyd gwledig pan oedd hi'n blentyn. Ceir hanes y fam-gu yn achub y pâr olaf o farcutiaid yng Nghymru, a dyma’n wir sy’n ychwanegu rhywfaint o antur i’r adrodd stori hyfryd. Cawn glywed mai braint y fam-gu oedd gwarchod y pâr o farcutiaid a oedd yn nythu mewn coeden dderwen ar eu fferm. Un diwrnod mae’n gweld bachgen ifanc yn ceisio dwyn wyau o’r nyth. Ond buan y sylweddolwn nad lleidr barus mohono, ond yn hytrach bachgen yn ceisio cael rhywfaint o arian i’w deulu am fod ei dad yn ddi-waith. Cyffyrddir yma â thema y gellid ei defnyddio i ysgogi trafodaethau gyda gwaith Addysg Bersonol a Chymdeithasol. Yng nghefn y llyfr ceir rhywfaint o wybodaeth ffeithiol am y barcud coch yng Nghymru heddiw, gwybodaeth a fyddai’n ddefnyddiol iawn fel ffynhonnell i blant hŷn sy’n gwneud prosiectau ymchwil, ac ati. Ceir yma hefyd gyfeirio at wefannau defnyddiol i ehangu gwybodaeth y plant am sefyllfa’r barcud coch ac ychwanegu at ddefnydd y plant o gyfrifiaduron! Llyfr hyfryd sy’n werth ei gael am ei stori ac sydd hefyd yn cyfrannu at y Cwricwlwm Cymreig. Adolygiad oddi ar www.gwales.com, trwy ganiatâd Cyngor Llyfrau Cymru.
Tell us what you thought of this book now!