Siwan Wyn, rated this book:
I mi mae diwyg y llyfr yma’n hyfryd. Mae’r lluniau’n hynod atmosfferig, yn gynnes a deniadol, gyda rhyw naws draddodiadol iddynt. Mae’r stori ei hun yn un syml, hudolus, sy’n ennyn chwilfrydedd plant yn syth. A yw Wiliam wir wedi gweld arth yn y cwtsh dan stâr? Mae’n ei fwydo ac yn gallu tynnu ei lun yn fyw iawn. Mae’n rhaid felly fod rhywbeth yn y cwtsh dan stâr? Dychymyg plentyn yw gwraidd holl hudoliaeth y stori hon, ond yn anffodus, mae’r addasiad wedi torri braidd ar y rhin yma i mi. Mae’r iaith yn tueddu i fod yn anodd, y brawddegau’n gymhleth ac amlgymalog a cheir nifer o ferfau cryno. Byddai angen plentyn aeddfed o ran oed darllen i fedru darllen y llyfr yma’n annibynnol ac rwy’n sicr y byddai sawl rhiant hefyd yn gwyro oddi ar y testun wrth ei ddarllen yn uchel. Fodd bynnag, mae’r berthynas rhwng Wiliam â’r arth yn un annwyl tu hwnt. Ceir yma ofnau a chyfrinachau plentyndod, wedi eu plethu’n hyfryd yn nychymyg y bachgen bach. Adolygiad oddi ar www.gwales.com, trwy ganiatâd Cyngor Llyfrau Cymru.
Tell us what you thought of this book now!