Gwenllïan Dafydd, rated this book:
Dyma lyfr bach hynod ddeniadol i blant bach, yn adrodd hanes Tedi yn mynd ar goll. Mae’r stori yn syml ac uniongyrchol, a’r lluniau lliwgar yn apelgar ac yn annog sgwrs. Gellid dweud yr un peth am bedair stori’r gyfres, cyfres sy’n llawn anturiaethau Tedi wrth iddo fynd ar goll mewn amrywiol lefydd, ond wastad â diweddglo hapus, diolch byth! Os mai maen prawf llenyddiaeth dda yw ennyn amrywiol deimladau yn y darllenydd, yna gall y llyfr hwn fod efo’r goreuon! Mae ymateb plentyn wrth ei ddarllen yn dweud y cyfan: yr ofn wrth i’r ffrind bach gorau, y Tedi, gael ei adael ar ôl; y dychryn wrth i’r ci ei lusgo i ffwrdd; y braw a’r arswyd fod Tedi yn awr yn ‘bell, bell i ffwrdd’; cynhesrwydd y cyfeillgarwch wrth i’r wylan ei godi; y dychryn a’r ofn eto wrth iddo syrthio o’r awyr a’r rhyddhad dros dro gyda’r geiriau ‘Dyna lwc!’. Ac yna’r hwyl a’r chwerthin wrth iddo syrffio yn arwain at y rhyddhad a’r gorfoledd o gyrraedd yn ôl i freichiau’i berchennog yn hapus ar y diwedd. Gall y darllenydd fynd ar daith emosiynol gyda Tedi, a’r cyfan yn helpu’r plentyn i ddeall ac i fynegi teimladau. Adolygiad oddi ar www.gwales.com, trwy ganiatâd Cyngor Llyfrau Cymru.
Tell us what you thought of this book now!