drama

Teulu cefnog, uchel ael, yw'r Morgans, yn adnabyddus ac yn uchel eu parch mewn ardal lle mae 'enw da' o dragwyddol bwys. Mae Richard a Margaret Morgan yn bileri'r gymdeithas, gyda Richard yn aelod blaengar o'r rotari a'r clwb pysgota a Margaret bob amser yn barod ei chymwynas i lu o achosion da. Maent yn byw ym Mryncelyn ac mae ganddynt dri o blant, Hywel, Llinos a Llŷr.

Mae Hywel, y mab hynaf yn feddyg ac yn arfer byw yn Llundain gyda'i wraig Catrin ac Owain, eu mab bychan. Mae Llinos, y ferch, yn berchen ar dafarn a bwyty moethus Pen y Cei, lle mae'n cyd–fyw ac yn cydweithio gyda'i phartner Danny, sydd, er mawr siom i'w mam, wedi ysgaru ac yn dad i ferch yn ei harddegau. Yn y gyfres gyntaf, roedd Llŷr, y cyw melyn ola' a channwyll llygaid ei fam, yn dal i fyw gartre' ym Mryncelyn ac yn rhedeg maes carafannau llwyddiannus ar dir y teulu.

Ym mhennod gyntaf y gyfres, yn sgîl marwolaeth annisgwyl Dr Walt, tad–yng–nghyfraith Hywel, fe'i gorfodir i wynebu'r ffaith mai dymuniad penna' ei wraig yw symud 'nôl i Aberaeron i fyw. I Hywel, sy'n feddyg llwyddiannus yn Llundain, mae'r syniad yn anathema llwyr. A fydd y 'teulu' yn llwyddo i ddwyn perswâd arno i ddychwelyd i'w wreiddiau i ddechrau bywyd newydd?

Yn y gyfres gyntaf, chwalwyd bywyd dedwydd y teulu gyda'r datguddiad mai Dr John, nid Richard Morgan, oedd tad Hywel. Cafwyd mwy o gyfrinachau hefyd, wrth i Hywel, sy'n cael ei bortreadu gan Geraint Morgan, gael perthynas gyda'i gydweithiwr a darpar wraig ei frawd, Dr Manon.

Wedi i'r gyfres ddiwethaf orffen gyda'r gwylwyr ar bigau'r draen yn dilyn priodas Llŷr a Dr Manon a thrawiad Dr John, gallwn ddisgwyl digon o gyffro ym mywydau aelodau'r teulu Morgan.

Rhys ap Hywel sy'n chwarae rhan aderyn brith y teulu, Llŷr. Mae'r actor, a chwaraeodd gymeriad Jason yn Pobol y Cwm am nifer o flynyddoedd, yn credu bod Llŷr yn gwybod bod ei wraig newydd wedi cael perthynas â'i frawd.

"Mae Llŷr yn amau bod Manon a Hywel wedi cael perthynas, ac efallai ei fod e'n gwybod. Ond mae e'n berson penderfynol iawn ac yn sicr ddim am i'w frawd mawr gael y gorau ohono," eglura.

Mewn bywyd go iawn, mae Rhys yn briod â'r actores Rhian Jones, sy'n chwarae rhan chwaer Llŷr, Llinos, yn y ddrama. Er bod Rhys yn mwynhau gweithio gyda'i gymar, dyw e ddim yn hawdd trefnu gofal plant!

"Fe wnes i gynhyrfu pan glywais i fy mod i'n mynd i weithio gyda Rhian. Ond gan fod gennym ni bedwar o blant, pan oedd un ohonom yn ffilmio, roedd y llall yn edrych ar ôl y plant," meddai Rhys, sydd yn byw yn Llanegwad, Sir Gaerfyrddin.

Yn y gyfres newydd, mae Llŷr ar fin agor clwb newydd ar y maes carafannau mae'n rhedeg ar dir y teulu. Mae e a Manon, sy'n cael ei chwarae gan Catrin Morgan, yn paratoi i symud o Fryncelyn i gartref newydd. Mae Llŷr ar ben ei ddigon, ond mae Manon a Hywel yn parhau i chwarae gyda thân, a does yr un gyfrinach yn saff am byth.

"Bydd llawer mwy o gyfrinachau'n cael eu datgelu yn y gyfres hon," meddai Rhys. "Ond sa i eisiau dweud gormod, bydd yn rhaid i chi wylio i ddarganfod mwy."