Rhai o gymeriadau mwyaf lliwgar y ffordd fawr fydd sêr rhaglen newydd Bois y Loris. Rhaglen sy'n canolbwyntio ar Gymry'r diwydiant cludo nwyddau.
Bydd gwrandawyr rhaglen radio Geraint Lloyd yn gyfarwydd â chlwb Bois y Loris. Yn y rhaglen ar Radio Cymru mae'r cyflwynydd yn clebran gyda gyrwyr ble bynnag maen nhw ar y lôn ac yn clywed mwy am eu hanesion.
Yn sgil poblogrwydd yr eitem, mae'r awdur a'r cynhyrchydd Owain Llŷr a Gwasg y Lolfa ar fin cyhoeddi llyfr Bois y Loris sy'n ein cyflwyno i fywyd a diwylliant ugain o yrwyr o bob cwr o Gymru. Bydd y rhaglen arbennig Bois y Loris yn mynd tu hwnt i'r llyfr wrth i Owain ddilyn tri gŵr am ddiwrnod yng nghab eu lorïau.
Y cyflwynydd radio Geraint Lloyd o Geredigion sy'n sôn mwy am hanes bois y loris ac yn egluro o le ddaeth y syniad wrth wraidd yr eitem.
Meddai Geraint, "Mae yna gymaint o Gymry Cymraeg sy'n gweithio yn y diwydiant ledled y byd ac maen nhw'n gymuned yn eu hunain. Erbyn hyn maen nhw'n adnabod ei gilydd trwy'r radio. Mae gan bob un bersonoliaeth liwgar, diddordebau a phrofiadau gwahanol a straeon difyr o'u hamser nhw ar yr heol. Bob wythnos mae'r criw yn dueddol o ddanfon negeseuon i'w gilydd neu dynnu coes drwy'r radio ac mae hynny'n tynnu nhw at ei gilydd."
Bydd Owain a'r camerâu yn dilyn diwrnod ym mywydau Emyr Richards neu 'Emyr Wyau' o Lanwrda, Sir Gaerfyrddin, Dorian Davies o Ystrad Aeron, Ceredigion ac Eifion Jones o Gwmsychbant, Ceredigion wrth eu gwaith yn y rhifyn arbennig ar S4C.
Meddai Owain, "Dyma'n cyfle ni i gael fwy o syniad am fywydau'r gyrwyr. Maen nhw mewn bybl bach eu hunain ac mae yna amrywiaeth ymhlith yr aelodau. Wrth ddilyn y tri, mae'r amrywiaeth yng ngwaith a diwylliant yn amlwg gyda phob un yn cludo nwyddau hollol wahanol ac mae amrywiaeth yn oed y gyrwyr hefyd. Tra bod Emyr yn cludo wyau, roedd Dorian yn cludo coed ac Eifion yn gyrru lori ailgylchu. Mewn ffordd, mae bois y loris yn allweddol i'n ffordd ni o fyw - hebddyn nhw fydd dim byd yn llwyddo i gyrraedd ein siopau."
© 2012 S4C
O Gymru / Made in Wales