Yn rhaglen gynta'r gyfres Doctor Doctor mae'r cyflwynwyr Dr Llinos Roberts a Dr Gwyn Jones yng Nghanolfan Atal Cancr Nightingale a Genesis ym Manceinion - yr unig ganolfan o'i math yn Ewrop. Mae'n cynnig gwasanaethau diagnostig a thriniaeth o'r lefel uchaf i fenywod a dynion gyda chancr y fron. Yn ogystal â'i gwaith yn trin cleifion, mae'r ganolfan yn gwneud gwaith arloesol i'r genynnau sy'n achosi cancr y fron - y cancr mwya' cyffredin ym Mhrydain.
Mae'r ganolfan wedi dyfeisio diet arbennig sy'n cael ei gynnig ganddynt fel modd o leihau'r risg o gancr ac afiechydon eraill - diet sy'n golygu rheoli beth mae person yn ei fwyta am ddeuddydd a bwyta'n arferol a chall am bum diwrnod arall yr wythnos. Mae Llinos yn trafod y diet gyda Delyth McEntee o Stockport, sydd wedi bod yn defnyddio'r diet gyda'i gŵr am dri mis. Mae Llinos hefyd yn cwrdd â'r Athro Gareth Evans, sy'n byw yng Nghilcain, Sir y Fflint. Mae e'n arwain ymchwil yn y ganolfan ar ddatblygiad cancr y fron.
Bydd y rhaglen hefyd yn ymweld ag anesthetydd yn Ysbyty Brenhinol Morgannwg, Dr Huw Davies, wrth iddo roi analgesic i fam yn asgwrn ei chefn er mwyn hwyluso genedigaeth ei mab. Ac fe glywn stori galonogol Rhys Davies, sy'n 14 mlwydd oed, o Nercwys ger Yr Wyddgrug, a'i frwydr yn erbyn cancr yr esgyrn ers yn dair oed.