Mae Betsan Rees yn steilydd llwyddiannus sydd wedi gweithio ar y ffilm boblogaidd Gladiator, y cyfresi teledu Footballers Wives a WawFfactor, yn ogystal â’r cylchgrawn American Vogue. Ond mewn rhaglen ddogfen emosiynol yr wythnos hon mae’n dechrau ar daith bersonol i goncro ei phroblem gyda’i phwysau, a’i pherthynas gymhleth â bwyd.
Mae Betsan, sy’n 32 oed ac yn dod o Drebanos ger Abertawe, wedi wynebu trasiedi bersonol yn ei bywyd. Bu farw ei brawd a’i thad, ac mae ei mam yn dioddef gyda’r clefyd Parkinson. Yn pwyso 23 stôn, roedd Betsan wedi cyrraedd pen ei thennyn wedi iddi gael ei gwrthod am lawdriniaeth fawr a fyddai wedi golygu cael styffylu ei stumog.
“Doedd dim gobaith gen i. Roedd fy mhwysau yn effeithio ar bob rhan o’ mywyd - fy mywyd cymdeithasol, fy iechyd, fy mherthynas ag eraill,” meddai.
Penderfynodd Betsan fod yn rhaid iddi wneud rhywbeth. Dechreuodd weithio gyda hyfforddwr personol a therapydd er mwyn gweld a fyddai’n bosibl iddi dorri’r cylch diddiwedd o orfwyta er mwyn cysur, magu pwysau a’r deiets drastig.
Mae cynhyrchydd y rhaglen, Nia Parry, yn falch o’r hyn a gyflawnodd Betsan wrth wneud y ddogfen hon. “Dyma stori Betsan. Ei llais hi rydym yn ei glywed drwy’r rhaglen,” meddai.
© 2008 S4C
O Gymru / Made in Wales