Bydd y gyfres yn mynd â ni i ynysoedd Ciwba, Fiji, Cyprus, Zanzibar, Gwlad yr Iâ a'r Galapagos.
Yn ystod y gyfres, fe fydd chwech o sêr y Sianel yn ymweld â'r ynysoedd gwahanol yma. Bydd Cerys Matthews, y cyn chwaraewr rygbi Gareth Davies, y ddarlledwraig Beti George, y newyddiadurwr Dylan Iorwerth, yr awdur a'r bardd Catrin Dafydd a gohebydd Wedi 7 Gerallt Pennant yn cwrdd â'r bobl sy'n gwneud y lleoedd yma mor arbennig.
Bydd y cyflwynwyr yn edrych ar hanes yr ynysoedd a gweld sut mae dylanwadau byd-eang yn effeithio ar eu ffordd o fyw, diwylliant, economi a hinsawdd.
Fe fydd gohebydd Wedi 7 Gerallt Pennant yn yr ynysoedd yn Ne America a wnaed yn enwog gan astudiaethau'r naturiaethwr Charles Darwin yn y 19eg ganrif.
Mae Gerallt yn adnabyddus am ei wybodaeth a'i frwdfrydedd am y byd natur ac am gefn gwlad. Yn naturiol felly, roedd cael cyfle i fynd i'r ynysoedd sydd yn enwog am eu cyfoeth o rywogaethau yn gwireddu breuddwyd i Gerallt.
Yr ynys a ysbrydolodd Charles Darwin i ddatblygu ei ddamcaniaethau am Ddethol Naturiol ymhlith anifeiliaid ac am Esblygiad.
"Doeddwn i'n methu credu mod i mor ffodus i gael mynd i'r Galapagos," meddai Gerallt Pennant. "Roeddwn i bob amser wedi meddwl am y lle yma fel un o'r ychydig lefydd ar ôl ar wyneb daear, sydd yn baradwys ddilychwyn."
Fil o gilometrau o afael tir mawr Ecuador, yng nglas y Môr Tawel, mae'r Galapagos yn gynefin i rai o greaduriaid a rhywogaethau prinnaf ein planed.
Stori am natur yn addasu ydy'r stori am oroesi yma. Mae'r stori honno wedi llywio ein dealltwriaeth ni o'r byd o'n cwmpas. Dyma pam bod y Galapagos yn un o Safleoedd Treftadaeth y Byd. Tan yn ddiweddar, dim ond dyrnaid o bobl oedd yn byw ar y Galapagos. Ond erbyn heddiw mae 22,000 wedi cartrefu yma. Mae presenoldeb dyn yn fygythiad i ddyfodol yr ynysoedd garw.
Ond fe fydd Gerallt Pennant yn gofyn - a yw hi'n rhy hwyr i achub y sefyllfa yn y Galapagos neu oes modd i'r bobl a'r bywyd gwyllt, ddysgu byw yma yn gytûn?
© 2012 S4C
O Gymru / Made in Wales