Mae diwrnod yr Ŵyl Cerdd Dant am fod yn un hynod o brysur i Nia Roberts, prif gyflwynwraig rhaglenni S4C o'r digwyddiad. Hi fydd yn cyflwyno o'r stiwdio arbennig yn Theatr Glan yr Afon, Casnewydd, gan wneud ei gorau i sicrhau fod y gwylwyr gartref yn cael gwir flas ar yr Ŵyl.
Ond mi fydd ganddi gymorth yn ystod y dydd. Bydd Mari Grug ac Iwan Griffiths yn cadw golwg ar yr hyn sy'n digwydd y tu cefn i'r llwyfan. Ac mae'n brofiad newydd i un ohonynt.
Mae Iwan, y gohebydd a'r cyflwynydd newyddion 26 oed o Benbarc ger Aberteifi, wedi hen arfer â chystadlu yn yr Ŵyl. Ond eleni, bydd yn cael y profiad newydd o gyflwyno rhaglenni teledu o'r Ŵyl.
"Rwy'n edrych ymlaen at gael siarad â phawb, ac rwy'n siŵr y bydd 'na dipyn o fwrlwm yno," meddai Iwan, sy'n byw erbyn hyn yng Nghaerdydd.
"Mi fydd pob dim yn arwain at uchafbwynt yr Ŵyl, sef y corau cerdd dant ar ddiwedd y noson. Rwy'n deall fod nifer dda o gorau'n cystadlu eleni felly mi fydd hi'n gyffrous iawn. Rwy'n edrych ymlaen at y sialens newydd hon."
Mae Iwan wedi mwynhau sawl profiad cofiadwy yn yr Ŵyl dros y blynyddoedd.
"Yr un sy'n aros yn y cof yw'r Ŵyl yn Aberystwyth pan ro'n i'n fyfyriwr yno, ac yn arwain Côr Pantycelyn. Mi roedd 'na gant o bobl yn y côr ac mi wnaethon ni ennill!
"Dwi hefyd wedi cystadlu gyda Dawnswyr Nantgarw ac fel aelod o driawd cerdd dant. Fydda i ddim yn cystadlu eleni ond dwi'n siŵr y bydda i'n mwynhau. Mae 'na naws arbennig yn perthyn i'r Ŵyl, mae'n wahanol iawn i'r Eisteddfod. Mae'n fwy traddodiadol, yn werinol."
© 2010 S4C
O Gymru / Made in Wales