S4C Gwyrdd

Bethan Gwanas

Cyflwynydd, Byw yn yr Ardd ac Ar y Lein, awdur, teithiwr a cholofnydd papur newydd

Ar raddfa o 1-10, pa mor wyrdd wyt ti'n meddwl wyt ti?

8 efallai?

Beth yw dy arfer mwyaf gwyrdd?

Dwi'n ailgylchu pob peth mae Cyngor Gwynedd yn gadael i mi ei ailgylchu yn y bocs glas, ac yn diffodd pob peth bob nos hefyd – dim byd ar standby.

Wyt ti'n gwybod beth yw dy ôl troed carbon ac wyt ti'n poeni?

Yn sgil Ar y Lein, mae'n siŵr ei fod o'n anferthol! Ond dwi'n trio dweud wrthyf i fy hun 'mod i'n galluogi pobl i weld y byd drwy ôl fy nhroed i fel nad oes angen iddyn nhw greu mwy o ddifrod. Ar y llaw arall, mae'n siŵr 'mod i'n perswadio pobl i deithio i rai o'r llefydd 'ma eu hunain... Ond pan dwi adre, dwi'n cerdded neu ar y beic yn aml. Ond weithiau'n gorfod cludo'r beic at lwybr diogel efo'r car yn gyntaf... o wel.

Faint wyt ti'n ail-gylchu?

Fy mhapurau, caniau, poteli bob pythefnos yn y bocs ailgylchu glas. Dim modd ailgylchu plastig yn amlach na phob hyn a hyn o fisoedd ar hyn o bryd (pan fydd fan arbennig yn dod i Ddolgellau), a dwi reit flin am y peth! Mae gen i fin compost hefyd a dwi'n defnyddio papurach, cardbord a sbarion coed i gynnau tân yn y tŷ.

Faint wyt ti'n ail-ddefnyddio?

Cryn dipyn: amlenni (mawr), papur lapio Nadolig, cardiau Nadolig i wneud labeli anrhegion, bagiau plastig fel bagiau bin, ac yn rhoi unrhyw ddillad nad ydw i'w hangen neu eu heisiau i ffrindiau neu i'r Groes Goch.

Pa fath o fylbiau golau sydd gen ti?

Y rhan fwya'n rai cyfeillgar bellach.

Wyt ti'n compostio?

Ydw, sbarion bwyd.

Beth oedd y peth gwyrdd diwethaf wnest ti?

Rhoi sbarion llysiau yn y compost bore 'ma.

Wyt ti'n meddwl all pawb wneud gwahaniaeth?

Ydw, yn bendant. Mae angen addysgu pawb. Dwi wedi sgwennu colofn ar y pwnc yn yr Herald yn ddiweddar.

Os daw hi i'r dilyw, beth fuaset ti'n ei achub o dy gartref – ar wahân i'r teulu?

Fy nyddiaduron. Ond mi fyddai'n anodd iawn gadael fy nghyfrifiadur gan fod gen i gymaint o waith ar ei hanner arno fo.