Mae 2008 yn flwyddyn dathlu 25 mlynedd o Ŵyl HSBC Jazz Aberhonddu, ac mi fydd S4C yn dod ag uchafbwyntiau'r dathliadau i'r sgrin.
Lisa Gwilym a Rhodri Owen fydd yn cyflwyno'r rhaglenni o'r Ŵyl. Byddwn ni'n gweld perfformiadau gan enwau mawr o'r byd jazz rhyngwladol fel Joan Armatrading a'r sacsoffonydd Maceo Parker. Yn ogystal, bydd rhai o gerddorion mwyaf blaenllaw Cymru'n ein diddanu, gan gynnwys Cerys Matthews a'r pianydd ifanc o Fangor, Gwilym Simcock, sy'n cael ei gymharu â'r enwog Keith Jarrett.
Mi fydd yna hefyd raglen ddogfen arbennig yn dathlu cyfraniad yr Ŵyl fyd enwog i fywyd cerddorol Cymru dros y 25 mlynedd diwethaf. Bydd rhai o sêr ifanc y sîn jazz yng Nghymru gan gynnwys y sacsoffonydd Osian Roberts, Burum a Huw Warren, yn sôn sut mae'r Ŵyl wedi ehangu eu gorwelion cerddorol ac yn edrych ar ei dylanwad hir dymor, ymhell tu hwnt i ffiniau'r Ŵyl ei hun.
© 2009 S4C
O Gymru / Made in Wales