Mwynhewch uchafbwyntiau Cyngerdd Gala'r Ŵyl gyda Katherine Jenkins. Mae'r gantores fyd-enwog yn dweud ei bod yn edrych ymlaen yn arw at berfformio unwaith eto ar lwyfan un o'i hoff wyliau cerddorol.
Nia Roberts fydd yn cyflwyno uchafbwyntiau'r Cyngerdd Gala pan fydd y gantores boblogaidd o Gymru, Katherine Jenkins, yn perfformio, ynghyd â'r tenor ifanc cyffrous o Ffrainc, Amaury Vassili, sydd eisoes wedi creu cynnwrf yn y byd cerddorol.
Mae Katherine yn edrych ymlaen yn arw at ddychwelyd i'r Ŵyl. "Dwi'n hoff iawn o'r Eisteddfod, ac yn hoffi'r ffaith ei bod yn dod â phobl o gymaint o wledydd gwahanol o amgylch y byd at ei gilydd ac yn eu huno drwy gyfrwng cerddoriaeth a'r celfyddydau," ychwanega Katherine.
Ei pherfformiad yn Eisteddfod Llangollen fydd yr unig gyfle i weld Katherine ar lwyfan yng Nghymru yr haf hwn. Ond ni chaiff gyfle i fwynhau gwyliau chwaith dros yr haf gan ei bod yn ymddangos mewn nifer o gyngherddau, ac yn teithio i Siapan ac Awstralia ac wedi hynny, yr Unol Daleithiau.
© 2012 S4C
O Gymru / Made in Wales
