Ffynnon Bywyd
Ffynnon Bywyd: does dim prinder o ddŵr yng Nghymru. Nid yn unig mae'n cynnal bywyd gwyllt, mae'n rhan allweddol o'r tirlun. Mae ein llynoedd, afonydd a chorsydd yn gartrefi i adar, pysgod a chreaduriaid cyfarwydd – a mwy anghyffredin.
Bydd Iolo'n edrych ar drigolion y tiroedd gwlyb a'u lle o fewn y tirlun.
Dyddiadur Dyn Camera - ffilmio Llysywod Pendwll yn yr afon
Roedden ni wir eisiau ffilmio'r creaduriaid hyn am eu bod mor ddiddorol, ac yn edrych fel rhywbeth o gyfnod cynhanes. Cawson ni wybod gan Simon Evans, yn Sefydliad Afonydd Gwy a Wysg, y byddan nhw dim ond yn silio o dan Bont Bochrwyd am ychydig o wythnosau ddechrau mis Mehefin. Doedd dim llawer o amser gyda ni, felly. Aeth John a fi i'w ffilmio nhw ar ddiwrnod heulog heb fod yn siŵr beth yn union fuasen ni'n ei gael.
mwy »
Gallwch chi ei gweld nhw o'r bont yn syth, mewn llecynnau golau o raean lle maen nhw wedi symud cerrig i fwrw sil. Roedd rhaid i ni baratoi'r camera tanddwr, yna cerddodd John trwy'r dŵr at lecyn y llysywod a thrymhau'r camera.
Trwy ddefnyddio monitor wedi ei gysylltu â'r camera gyda chebl hir, roedden ni'n gallu gwylio'r llysywod o lan yr afon. Cawson ni'n syfrdanu gan ba mor anhygoel roedd y creaduriaid yma'n edrych wrth agosau atyn nhw, ac ansawdd y deunydd roedden ni'n ei ffilmio.
Roedd hyn yn rhannol am nad oedd y llysywod yn poeni am y camera o gwbl. Daethon nhw'n agos iawn ato heb gymryd sylw ohono am eu bod nhw'n canolbwyntio gymaint ar eu tasg o symud cerrig a bwrw sil.
Penderfynon ni drio gweithio'r camera â llaw gan nad oedd ots gan y llysywod ein bod ni yno. Roedd hyn yn golygu y gallen ni ffilmio lluniau symudol yn hytrach na lluniau llonydd, a'u dilyn gyda'r camera wrth iddyn nhw lusgo'r cerrig o gwmpas. Buodd John ar ei gwrcwd yn y dŵr yn eu ffilmio nhw, a dim ond wedyn sylweddolodd e fod twll yn ei esgidiau pysgota!
« llai
