Bu rhaglenni Noson Lawen yn rhan allweddol o ddarpariaeth adloniant ysgafn S4C ers y rhaglen gyntaf honno o Lanuwchllyn 'nôl yn 1982, a heblaw am fwlch byr yn niwedd yr 80au, cynhyrchwyd cyfresi blynyddol a fu'n ffefrynau cyson gan wylwyr y sianel.
Y cyfrif diweddaraf yw bod 250 rhaglen wedi ymddangos hyd yma, heb sôn am y cyfresi Hwyl y Noson Lawen, sef uchafbwyntiau cyfresi'r flwyddyn cynt. Yn naturiol, mae natur y rhaglenni wedi newid dros y blynyddoedd; ffarweliwyd â'r bêls gwair am resymau diogelwch; wrth i ofynion y llwyfan a'r goleuo ddatblygu bu'n rhaid chwilio am siediau mwy, ambell Ganolfan Hamdden a hyd yn oed Stiwdio Deledu ar achlysuron arbennig; cafwyd band sefydlog yn cyfeilio ac yn gyffredinol daeth safonau cynhyrchu adloniant ysgafn i fod yn rhan annatod o'r noson.
Ond yr un ydy hanfodion y rhaglen heddiw ag oedden nhw yn ôl yn 1982; arweinydd ffraeth yn cadw'r gynulleidfa yn eu dyblau wrth lywio'r noson, cantorion a cherddorion safonol yn eu maes - boed werin, cerdd dant, clasurol, pop, canu gwlad, jazz - corau safonol sy'n gyrru ias i lawr gefnau'r gynulleidfa a dogn helaeth o hiwmor gan ddiddanwyr sy'n adnabod eu cynulleidfa.
Rhoddir cyfle i wynebau newydd rannu llwyfan gyda mawrion y byd adloniant Cymraeg, ac efallai, yr elfen bwysicaf oll, hanfod y Noson Lawen yw ei bod yn ymweld â chymunedau led-led Cymru er mwyn dod â'r adloniant Cymraeg gorau posib i'w milltir sgwâr nhw. Heb y gynulleidfa honno, 'does dim Noson Lawen.